Tan lak leh tanrual a ngai e - (27-9-2014 Issue Editorial)

Mi thahnemngaite zarah YMA THIAN chu a la kal ve hram hram a, a chhuah theihna tura thuziak leh sum hmanga tha thawhtute zawng zawng chungah lawmthu kan sawi e.

Bairabi khawtlang hmangaihna au aw leh a that theihna tura tha thawh duhtu kan la awm hi a thlamuanthlak a, tan la deuh deuh turin kan in chah thar ve nise.

Kan chanchinbu hi thenkhat tan chuan chuti tehlua chu a nilo ngei ang, mahse Bairabi khuain kan neih chhun a la nih miau avangin hma a sawn theihna tur kawng ngaihtuahpui theuh turin kan inngen bawk a ni.

A latu thenkhat ten a man kan pek that theihloh avangin October thla atang chuan a copy tihtlem a ni dawn a, a lakna man pe ngailo chu a copy kan inpe tawh dawn lova, lo hrethiam turin kan inngen e.

Kan khua hian nasa takin hmasawnna lamah ke kan pen a, inlungrualna lamah pawh ke kan pen zel a tul awm e.

Zampuimanga Group YMA in 2015 YMA Gen. Conference Bairabi-a thlen turin a dil mek a, palaiten an remtih chuan kan thlen ngei pawh a rinawm.

Inkhawmpui Lian thlen hi kawng tam taka hmasawnna a ni a, YMA Gen. Conference hi kan thleng a nih chuan kawng hrang hrangah hma kan sawn phah ngei a rinawm.

Chutihrualin, YMA Gen. Conference hi lo thleng dawn ta tak tak ila tihtur leh inbuatsaihna tur kan ngah hle in a lang. Khawtlang hruaina kawnga pawl hrang hranga a thibeh chin te chu mawngvawm ba ang zar zara chet a ngai maithei e.

A hmasa berah chuan Bairabi in 1000 khuaa inchhal ah hian chhungkua zawng zawng chu ngai lo turah lo ngai ila, in 600/700 vel hian a tul anga mikhual 10 bawr vel theuh tal thleng thei tura kan inbuatsaih a ngai awm e. Tin, mikhualte ei leh in, riahna chauh ni lovin Tui tamna hmun leh Tlawng kama cheng te hian mikhualte tui kan nghei pui mai ang tih a hlauhawm. Chhungkua leh a department lam pawn kan tui lakna leh dahkhawlna te tun aia hnianghnar zawk tura tan kan lak a ngai ang.

Khaw karkawng hi sorkar in tha takin min siamsak turah ngai ila. Khaw chhung inkalpawhna hrang hrang te hi mawihnai zawka thuam that a tul ngei ang.

Engpawhnise, khawtlang mipuite leh khawtlang hruaitu, sorkar department te lungrual taka, kawikawm thin ang thap kan nih chuan engmah a harsa lovang. Tun aia nasa in tan i la ang u, i tangrual ang u.