Kan thupui hi ‘a mak mange aw’ kan ti ngeiin ka ring. Zawhna lo awm thei hmasa ber tur chu, tute nge hausa, tute nge rethei? tih hi a nih ka ring. Kan ram pum chu sawi loh, kan khawtlangah ringawt pawh hian kan inang lo hlawm hle ang. Sawi zau vak lovin ngaihtuah zui mai ila a tha awm e.“Retheih hi chu a va hreawm tak em ve aw...” tia indawm kun vawng vawng mai awl tak a ni. Thu thiam zawkte cho chhuah nan pawh a tha e. Department emaw, tute emaw demna pawh ni chuang lovin heti hian i thlir teh ang.
A hmasa berin kan ngaimawh tlan em em, vawiin thlenga awmzia kan la neih chuang loh, nasa taka an beih hnu pawha awmzia awm chuang reng reng lo, kan tui Bill hi mawle, a retheih thlak hle mai. Khawl hmanga pump chhuah nilo... sawi tam lo mai teh ang. Retheih tawh nak a laiin, retheih a ti zual hle mai.
A dawt lehah chuan kan Electric Bill sang lutuk hi mawle. Retheih hi chu.. kan ti reng mai dawn a ang hle mai. Chhit dan leh hman dan in ang rengah pawh Bill san viau thla te ala awm zui a, Bill san thlain inhlawhna rate a sang chuang bawk silo. A retheih thlak hle mai. Miten engtinnge an tih? tih hi rilruah a awm fo thin.
A dawt lehah chuan Gas harsa ta em em mai hi mawle. Bur khat Rs. 1000/- chuanga lei a ngai fo ta mai si a(h). Retheih hi chu aw, ava hreawm tak em ka ti thin. Thingtuah han ring theuh dawn ila ramngaw humhalh tul kan ti a, kan inzirtir chamchi mai bawk si, pen thiam a har a, kal thiam a har a, ke a bai a nih hi. Engdang a ni love, retheih hi a pawi ber mai.
Tin, sawrkar zarah kawngpui nei tha pawl tak kan ni ang. Heti chung hian sumo chuan man an la ti sang zui lehnghal a, retheih hi chu aw!! Mahni tawrhna tur lam rel a harsa a, mite tawrhna tur lam erawh chu thuthlukna siam awl tak a ni. Hetiangah hian khawtlang mipuite hnenah Information fel tak pek zel a tha hle ang.
Anhnah Rs. 10/- kha, Rs 20/-, a thlepin a to a nih chu mawle!! Sawi sen a ni lo. Sawrkar hnathawk hlawh a thlepin a pung ve silo. Thil man tisangtu mihring, a tuartu mipui tho, kut hnathawh zak thalaite, mi duh ang duh ve bawk si, a va inmil lo em!!
Sawi tur a tam a, heti zawng hian rilru lo siam ta ila. Retheihna avangin Pathian ka kalsan tur a ni lova, retheihna avangin ruk ruk emaw mi rawk leh thil thalo dang ka tih phah tur a ni chuang lo. Mite neih ang neih tum avanga tute emaw sum leh pai hmanga lo in vur tum ve ngawt te hi Pathian duh loh zawng a ni tih hre rengin nitin hnaa rinawm taka ka thawh a, ka ei hi Pathian thu a ni a. Retheihna chhuanlama tute emaw beih vak leh dem vakte hi kan tihtur a nih loh hmel. Mobile hum thei i nih chuan hmang tangkai rawh. Thil thar i neih a, a tangkai zawnga i hmang thiamlo a nih chuan neih loh hi a him ber fo.
A tawp berah chuan, retheihna hi kan kutah dah reng bik lo ila, puan ven sawi chhing ila, Pathian duh dan zawk ngaihtuah chunga kal thiam tum ila, hausa ta viau ila mite tan ka hnawk viau maithei. Remruattu Pathian duh dana kan awm thiam a pawimawh viau a ni. Hausak dan thiamte, retheih dan thiamte hi miten an bula awm nuam an ti a, an ngaina thin a ni. //
No comments:
Post a Comment