YMA THIAN 1-11-2014 Issue Editorial :: Ngaihtuah ngun a ngai e..

Rilru-a awm awm hi han thailang ve thawr zel ila, a hre zawk te kan infinchhuahna a nih phak chiah loh pawhin eng eng emaw ah tal chuan a thawk mahna.

Bairabi khaw lar ve taka an sawi leh sorkar atang pawha hmun pawimawh tak nia sawi hi kan pawimawh tawk lo nge ni harsatna hi a lian bik riau thin niin a lang.

A hmasa berah chuan nikum lam atanga kan beisei em em State Bank chu tun thlengin hawn a la nilo. Thuneitu lam ten tun thlenga hawn a la nih loh chhan an sawi hi a pawmawm viau zel, a nihna tak va hre ve lo te hriatphak lohah hian harsatna tam tak hi awm thei a ni.

Tin, National Highway siam mekah hian engang harsatna fakau nge inphum ru ang aw? District thuneitu berin hna tan tura thupek a chhuah tawh lai pawhin tun thlengin hmalakna thar hmuh tur a la awm lova, hei hi engnge a chhan ni ang le? Sorkar-in hnathawk tura a rawih contractor lamah nge ni anga, khawtlang mipuite ah hian?

Engpawhnise, rilrua thil lian tak awm chu Bairabi-ah hian sap tawnga ‘Impossible’ an tih hi a tam bik lutuk niin a lang. Kawhmawh bawl ni hauh silova kan chanvo diktak kan chan theihna tura ngenngawl taka kan beih hi kan mawhphurhna niin a lang.

Khawtlang mipuiin, “kan khawtlang hruaitu; a bik takin VC te hi a lawm” kan ti ringawt thin hi a diklo maithei. Tun aia nasa hian khawtlang hmasawnna tur leh changkanna tur kawngah hian pawl hrang hrang, kohhran leh mimal ang pawn aw kan neih tam a, kan beih deuh deuh hi a ngai niin a lang, Bairabi tan tiin.

Internet kaltlangin Kolasib DC office dawr theih tawh dawn

Government of India in mipuite tan sorkar office te awlsam zawka kan dawr theihna atan tunlai thiamna Information Technology hmang tangkaiin NeGP a ruahman a. National e-Governance Plan kaltlang hian sorkar office te mahni veng leh khua theuh atangin awlsam takin kan dawr thei tawh dawn a ni. NeGP hnuaiah hian e-District Project chu kalpui mek niin tunah hian Kolasib District ah hman theih tura ruahman fel a ni tawh a, mipuiten tangkai taka an hman theih beisei a ni.

e-District Project hnuaiah hian Tribal Certificate, Income Certificate, Residential Certificate, {Inner Line Pass (Regular/Temporary)} te hi Bairabi khuaa Common Service Centre atangin a lak ve theih tawh dawn a ni. Hrechiang duh chuan Bairabi CSC, VLE - Phone No. 8974419654 ah zawhfiah theih a ni ang.

Chhandamna Camping nei dawn

Bairabi Chhimveng Presbyterian Kohhran chuan Gospel Reapers Team - Speaker Pu Lalsangluia Sailo ruaiin November ni 3 atang hian Chhandamna Camping an buatsaih dawn. Camping chhawng khatna hi rawngbawltu pualin neih a ni anga, a chhawng hnihna atangin mipui nawlpui tan buatsaih a ni ang. Bairabi khawtlang mipui a duh apiangte he Camping-a lut tur hian sawm kan ni a, Camp lut tur ten Bible, Note bu leh mahni mutbu bakah buhfai Kg-2 kentel tur a ni ang.

KAN SAKRUANG MIZORAM TAN - Buatsaiha

A sakhming Mizoram ti a kan chhal, 'kan zotlang ram nuam, chhawrpial run i iang e' tia zai kan vawr hnan ngei mai hi, hei lo hi chu zofaten kan ram tia chhal ngam leh chhal tur kan nei lo, a chhiat a thatah a mawhphurtu chu nang leh kei kan ni a, a tuartu leh a lawm tur pawh nang leh kei bawk kan ni.

Mahni ram hmangaih nachang hre lo inti changkang ve ringawt kan nih chuan kan changkanna chuan kan changkan loh zia a ti lang mai mai a ni. I ram a thianghlim chuan nang pawh i thianghlim a ni mai, i ram hmai a bal a nih chuan i hmai a fai bik chuang lovang.

Thil tha pui pui leh hmanraw changkang ber ber pawh lakhawmin, sum leh pai hman sen loh nei mah la, i ram ber a dam si loh chuan i thil neihte chu thlam chhunga in cheina lak luh ang chauh a ni mai dawn a sin, I thiam na te chuan mite thiam na zawng zawng khum mahse i hmelthatna te pawh mi dang chunga leng ni mahse i ram tan i tha i sen chuang si loh chuan Dar benthek ri pawh i tluk chuang lo tihna a ni.

He leilung MIZORAM tia kan chhal ah hian, i thiam, i theihna te chu luan ral tir ve la, mite pawn an ram tan lu chhum ban chhum huamin tha an lo thawh tawh a, chumi rah seng chuan nuam an tawl ve chauh a ni tih hriain, i tu leh fa te tan ram nuam buatsaih turin i thlan tui han far tir ve teh le.

Hrehawm hmasak ngam lo te hi a lawm hrehawm a tawp leh si thin te chu, chuvangin hrehawm hmasak huam la, i ram tan i theihna kha a tlem emaw a tam emaw han seng ve reng reng teh.

Nangni ram hruaitu lu leh officer lian te u, sum leh pai khan a chhandam dawn lo che u a, zahawmna a pe hek lo ang che u, Tunah a ti theitu in nih lai khan in damlai lung chu han phun teh u, in thlanlung chunga thangthar ten selna ni lo, zahna leh fakna awka an phuh chhuah theih nan i ram tan thil chhinchhiah tlak, ram rohlu chu han phum mawlh teh u.

Kuttling lo a in thiltihte hian nakinah in thlahte a la vel tap ngei dawn a nia, chumi a thlen hma chuan in siam tha in, i ram tan in theih tawp chhuah ula, in thlahte hmai pawh a uang thei zawk ngei ang, i theih tawk ai sang kan phut lo che u a, in theih tawk in tih duh loh vang hian kan dem mai zawk che u a ni.

Faktlak a thil i ti thei lo a nih pawhin, sel ngai chuan awm lul tawh suh, i ram hian mi tha lo chu a in todelh mah mah ta e, khaw nge baal hmaa thingthi ngai lo val rual leh lanu te kha rawn zuang chhuak ula, raltiang ram kai turin ram kal in siam dawn teh ang u, kan thenawm ram ten hmatiang an sawn lai hian mizo kan ni kan hmel a tha ti a, tawng zuah zuah lovin a thawhin in thawk teh ang u.

I thiltihin i hmelthatna chu pho chhuak la, chhawrpial run tih nena in mawi turin he ram MIZORAM ngei mai hi thenawm ram te hmaa hmel uang ngam khawpin in siam teh ang u, Mi dik lo leh zawm thaw te chu lo kiang u la, mi tha ram hmangaihtu an rawn pen chhuak dawn e.

HAWH U, THILTIH HMANGIN ZAHAWMNA CHU I’N HLAWH CHHUAK DAWN TEH ANG U HMIANG.

70th YMA General Conference 2015 Organising in Sub-Committee hruaitu an ruat fel ta

Dt 31.10.2014, Zirtawpni chawhma dar 10:30 khan YMA Gen. Conference vawi-70 na Zampuimanga Group YMA in kan thlen tur, Organising Committee meeting Bairabi North YMA Library Hall-ah neih a ni a. Organising Committee hmasain Sub-Committee peng hrang hrang a lo din tawh hruaitu tur te hetiang hian ruat a ni.

Pandal Sub-Committee :
Chairman - Pu C.J.Lianchungnunga
Secretary - Pu R.L.Thachungnunga
Treasurer - Pu Lalrinawma Hrahsel (SDO, PWD)

Refreshment Sub-Committee :
Chairman - Pu H.Vanlalrova
Secretary - Pu H.Lalbiakmawia
Treasurer - Pu H.Lalhmangaiha

Reception Sub-Committee :
Chairman - Pu C.Vanlalzawma
Secretary - Pu Lalbiakzama
Treasurer - Pu Vanlalnghaka, Fin. Secy G.YMA
Souvenir Sub-Committee :
Chairman - Pu B.Lalnunkima
Secretary - Tv F.Vanlalsiama
Treasurer - Pu K.Lallianpuia, Vice President G.YMA

Sound & Light Sub-Committee :
Chairman - Pu H.Zirsangliana
Secretary - Pu H.Vanlalnela
Treasurer - Pu PC Chuauhmingthanga

Decoration Sub-Committee :
Chairman - Pu R.Lalfakawma
Secretary - Pu C.Lallawmsanga
Treasurer - Pi H.Lalnuntluangi

Ushering Sub-Committee :
Chairman - Pu H.Lalzawmliana
Secretary - Pu C.Lalchhandama
Treasurer - Pu F.Vanlalbela

Health & Medical Sub-Committee :
Chairman - Pu H.Vanlalhruaia
Secretary - Pu HD Lalhlimawma
Treasurer - Pi Chawngthuami

Information & Publicity Sub-Committee :
Chairman - Pu C.Lalbiakenga
Secretary - Pu PB Lalnunmawia
Treasurer - Pu PC Lianzuala

Food & Supplies Sub-Committee :
Chairman - Pu J.Lalchhuanawma, VCP Bairabi
Secretary - Pu K.Lalrempuia
Treasurer - Pu J.Vanlalhruaia

Water & Sanitation Sub-Committee :
Chairman - Pu R.Lalrinawma
Secretary - Pu Albert Lalchhanhima
Treasurer - Pu HB Lalthafamkima

Traffic & Security Sub-Committee :
Chairman - Pu F.Lalduhawma
Secretary - Pu K.Lalrinchhana
Treasurer - Pu F.Lalhriattira

Sub-Committee peng hrang hrang committee member tur te hi Group huamchhunga YMA Branch ten an Branch member atanga an thawhkhawm te ziakin Organising Committee-ah an thehlut anga, Dt 21.11.2014, Zirtawpni-a Organising Committee OB, Sub-Committee hrang hrang OB leh Group YMA OB ten Joint meeting an neih hunah Sub-Committee hrang hrang Committee member tur te hi an ruat fel dawn a ni.

Khawvel S.S Ni

November ni 2 hi Khawvel Sunday School Ni a ni a, Mizoram Synod hnuaia Presbyterian Kohhran hrang hrang ten hemi puala thuchah; Puitling lamah Rev. Dr Zairema chanchin leh Naupang lamah Nl R.Lalbiakchhungi chanchin an zir ang.

Gov’t H/S in Unity Day hmang

India hnam inpumkhatna ni (National Unity Day) October ni 31, 2014 (Zirtawpni) denchhenin Gov’t Bairabi High School chuan Zohlun Veng-Thlanmual kawng leh khawchhung kawngpui dung thenfai hnatlang an nei. National Unity Day (Rastrya Ekta Diwas) hi hnam inpumkhatna atana nasa taka beitu Sardar Vallabhbhai Patel-a piancham denchhena hman thin a ni.

MZI inhmukhawm

Mizo Zaimi Insuihkhawm Pawl (MZI) Bairabi chu Dt 28.10.2014 khan Pu R.Lalfakawma In, Rimawi Vengah an inhmukhawm. He hunah hian 2014  Krismas denchhena miharsate tanpui dan tur ngaihtuah a ni. MZI Bairabi te hian kumtawp lamah miharsate tanpui  na tur puala Concert neih an tum a, khawtlang mipuite tawiawmna an ngen thu an tarlang tel bawk a ni.

NR inhlawhna thawk dawn

MNREGS hnuaia inhlawhna neih mekah kar thar lama khian ni 7 inhlawhna neih a ni leh dawn a, hnathawhna tur hmun hi Vankhuma Lui zau lamah a ni dawn a, Job Card holder te hnathawh tur hi ‘peg’ khen a nih thu dawn a ni.

PMJDY Survey

Central YMA hriatpuina anga Regional Manager, State Bank of India atanga PMJDY Survey tura ngenna hmuh anih angin tunlai hian Bairabi khaw chhungah PMJDY survey neih mek a ni a. Survey hna hi Bairabi North & South Branch YMA ten an thawk a ni.

Bairabi nula Duhawmi India aiawhin khel dawn

Lalduhawmi D/o Lalnunsanga, Ramhlunveng, Bairabi Chhimveng chu under 19 Girls Football Team India aiawha Asian Football Confederation Under 19 Women's Championships 2015 Qualifier, November ni 2, 2014-a Jordan-a khel turah thlan a ni.

India aiawha khel tur thlanna hi Gandhinagar-ah neih a ni a, mi 34 in trial neiin first selection-ah mi 4 an tla a, second selection-ah mi 7 chhawk lehin Final Squad tura thlan mi 23 zingah mizo 2; Laduhawmi, Bairabi leh Lalhruaizeli, ITI Veng Aizawl te chu thlan tel an ni.

Lalduhawmi te hi Subroto Cup International Football Tournment players, Mizoram Sports & Youth Services tirh niin Under 19 Girls Football Team Gandhinagar-a India aiawh tur thlanna Final selection hi an paltlang thei a ni. Duhawmi hian vawi engemawzat Mizoram aiawha Football lo khel tawhin Champion team-ah te pawh a lo tel tawh a ni.

Ramthar Veng Tangrual Pawl ten theihtawp chhuah zel

Ramthar Veng Tangrual Pawl chuan theih ang tawkin hma an la mek a, pawl din tirh atanga hmalak tawhna hrang hrang te :

1. Vengchhung hmun hrang hrangah bawlhhlawh bawm dah a ni a, vengchhung thenfai hnatlang neih a ni.
2. Vengchhungah ngawrh takin ruihhlo khuahkhirh a ni a, ruihhlo an mansak mi 6 te chu Chhandamna Camping-ah dahluh an ni a, Camping senso turin Rs 1000/- an hlan bawk.

3. Vengchhung hmun 11 ah Street Light an dah tawh a, dah belh tumin hma an la mek.

4. Vengchhung khawtlang mipuite kokhawmin kawng hrang hranga hmasawnna; Zirna, ruihhlo laka fihlimna, chhungkaw inenkawlna tha zawk neih a nih theihnan te leh vengchhung a lo thianghlim deuh deuh theihna turin Awareness Campaign neih a ni tawh bawk.

Village Council leh All NGO te meeting

Ni 30.10.2014, Ningani zan dar 6:30pm khan Bairabi Village Council bultumin VC te leh Bairabi khawchhunga NGO hrang hrang ten Pu J. Lalchhuanawma, VCP inah meeting an nei.

He meeting-ah hian NGO hrang hrang hruaitute an tel tha hle a, khawtlang inrelbawlna kawnga hmalakna tur hrang hrang te sawiin an thurel langsar zual te:

1. Bairabi khawtlanga ruihhlo leh sualna do kawngah khawchhunga veng tin ten an remchan dan anga Veng Tangrual Pawl din nise, Police Department lam te berawnin Chhimveng leh Hmarvengah VDP din ni bawk se, Village Council kaihhruainain NGO hrang hrangten ruihhlo do kawngah hmalak ni bawk se.

2. Bairabi khaw kawng National Highway, Compensation in a tihbuai loh chin siam mai theih chu Dt 20.10.2014 atanga a siam hna thawk tan tura Kolasib DC in thu a chhuah chu tun thlenga hnathawh tan a la nilo chu All NGO Committee in a tul anga hmalak nise.

3. Zahmingthanga, Ramthar Veng in a fanu Hmingthanpuii, kum-6 mi chu Nazareth Nursing Home, Kolasib Tumpui-a thawkten an chiu (Injection) sual avangin a kephah tan a ni a, a fanu chunga thil thleng chungchanga a lungawilohna All NGO Committee-a a rawn thlen chu vanduaina tawkte hmalakna kawngah theihtawp chhuahpui nise, Village Council lamin lo bawhzui se tih a ni.

He meeting-ah hian State Bank of India Bairabi Branch hawng tura hmalak mekna chungchang te ngaihthlak a ni a, State Bank-a hman tur Internet connection lamah harsatna engemaw a la awm avanga Bank hi la hawng lo chauh nia thu dawn a ni.