Cyber Security leh Social Media Security

(69th YMA General Conference, Ratu a Pu Lalthlamuana, CIO, ICT thusawi lakchhuah)


THUHMAHRUAI:
Kum 2009 YMA General Conference, Darlawn-ah khan “Cyber Crime leh Mizo Society” chungchang kan sawi tawh a. Tunah, kum nga (5) a lo liam ta, YMA General Conference, Ratu-ah “Cyber Security and Social Media Security” kan sawi ve thung dawn a ni.

A hmasain kan thupui awmzia hi han sawifiah hmasa ila – “CYBER” tih tawngkam hi Greek tawng “Kubernetes” atanga lakchhuah a ni a, Saptawngin “Cybernetics” tihna a ni. A awmzia chu Computer khawlthluak nei, Internet leh Mobile phone inthlunzawmna khawvel tihna a ni. “Cyber Security” in a tum ber chu kan mimal thil, sum leh pai, leh sumdawnna te hi computer, Internet leh Mobile kaltlanga tih anih tawh avangin venhim an ngaia,anih loh chuan misualtute emawin kan Computer leh Mobile phone a kan thildah te an ruchhuak thei a, an hmang khaw lo thei ani.Heng thilsualtitute lakakan inven fimkhur theihna tura kawng in kawh hmuh hi kan tum ber a ni. “Social Media Security”awmzia chu social networking hmanrua facebook, twitter, whatsapp, youtube, etc. te leh social media hmanrua computer, Internet leh Mobile phone te himna tura kawng in kawh hmuhna a ni. Tunah hian kan Mizo society hi Cyber society ah kan tawlhlut mek a, kan khawtlang nunphung pawh social network avangin a lo danglam zo ta a, a taka thian inkawm aiin social media hmanga thian inkawm kan lo uar ta. Heng Social Media te hi hmansual awlsam tak a ni a, kan mizo thalaite zingah pawh kan hmang sual nasa em em a. Heng avang hian kan khawtlang nunah harsatna leh buaina kan tawk chho mek a ni. Heng harsatna leh buaina kan tawh lohna tur hian Social Media Security chung chang hi kan hriat a pawimawh hle a ni.

Cyber Security leh Social Media chung chang hi a pawimawh a ni ang, khawvel ram changkang a piangah ngaihpawimawh a hlawh hle. Mizoram pawhin a ngaipawimawh a ni ang YMA General Conference-ah meuh pawh sawi chhuah a lo ni ta. YMA kum puan “Ram leh hnam humhalh” hian a huam zau hle a, Cyber Security leh Social Media Security chung chang pawh hi ram leh hnam humhalhna kawngah hian kan ngaihthah thei lovang. Cyber Crime avanga kan mualpho lohna tur leh kan ram leh hnam kan him theihna turin he thupui “Cyber Security and Social Media Security” chungchang hi tun tumah hian kan zirho dawn a ni.

Booklet-ah leh General Conference Bu-ah khan a kimchangin tarlan a ni a. Booklet-ah khan Internet ethics, Browser Security, Desktop Security, Online Banking Security, Credit leh Debit Card Security, Mobile Phone Security, Internet Security, Social Network Security te leh zawhna leh chhanna pawimawh tak tak tarlan a ni a. Tun tumah hian khang Booklet-a mi zawng zawng kha kan sawi vek hman dawn lova, a pawimawh zual pali (4) chauh ka rawn sawi dawn a ni.

SIM CARD PREPAID:
SIM Card Prepaid tihnunsa zawrh leh hman hi dan bawhchhiatna sual lian tham tak a tling a, heng dan bawhchhiate hi Lungin (Jail) tan tir bakah pawisa tam tak chawitir theih an ni bawk. SIM Card tihnunsa zuar tur chuan tuemaw hminga SIM Card kha lo registered lawk a ngai a, registered tur chuan mi tuemaw hming, Photo, Voter’s ID leh Address proof hman a ngai thin. Chung chu sumdawn nana hmangin midang hnenah an hralh chhawng leh thin. Heng SIM Card tihnunsa zuartute hian dan an bawhchhiat avangin an chungah hremna dan “IPC – 465: Forgery Case” leh “IPC – 499: Defamation Case” an awrh thei a ni.

Tin, SIM Card prepaid tihnunsa hmangtute pawh hian anmahni hming ni lova SIM Card an neih avangin dan an bawhchhia tihna a ni a, hremna dan “IPC-416” hmanga hrem theih an ni bawk.

SIM Card tihnunsa zawrh leh hman avanga harsatna kan tawh theih thenkhatte:

–       Mahni hming leh nihna inthupin Mobile Number kan nei a, chumi avang chuan mi tute emaw tihhmingchhiat nan leh tihmualpho nan hman kan ching.

–       Terrorist (Hel pawl) te tan Mobile Phone neih a ti awlsam a, suahsual rawngbawlna chi hrang hrang entirnan Bomb kam nan leh tihpuahnan an hmang thei.

–       SIM Card mahni hming ni lova neih a nih avangin misual an huangtau a, CATV leh Social Network (FB, Whatapp, Youtube) velah an huat zawng sawiselnan leh Sorkar dodalna huaisen tak takin an sawi thin. Tin, mahni hming thupa thilti an nih avangin Mizo nula saruak phochhuah te an chin phah bawk thin.

Hetianga sual rawngbawltute hi an Mobile number atangin zawng chhuak dawn ila, thilsual titu dik tak man lovin a tilotu zawk, a hming tumtu kha, man an nih phah thei a ni. Mipui pawisawilo zawkten kan tawrh phah theih avang hian SIM Card prepaid tihnunsa zawrh leh hman hi i bansan ang u. Dikna leh Rinawmna vawng nung zel tur kan ni tih hre rengin heng thil tha lo, kan ram leh hnam mualphona thlen theitu hi i do dal ngam ang u.

SOCIAL MEDIA/SOCIAL NETWORK
Tunlai khawvel thalaite zinga lar em em chu “Social Network” leh “Social Media” te hi an ni. Awlsam taka kan inbiak pawh a, thu leh hla, thlalak (photo) leh video kan inthawn tawn zung zung theihnan khawvel huapzo Network siam a ni a, chu chu “Social Network” kan tih hi a ni. Hemi atan a hmanrua kan hman thin Computer, Internet, Mobile Phone, etc te hi “Social Media” kan tih chu a ni.

Social Networking atana kan hman lar deuh deuh te chu – Facebook, Whatsapp, Wechat, Twitter, Messenger, Youtube, etc te an ni. He Social Networking hian thatna tam tak nei mahse mi tam tak tan chhiatna a thlen thei a ni.

Mi thenkhat ten mahni nihna thupin midangte sawisel nan te, diklo taka Sorkar sawisel nan te, mi thlalak duk dak lo tak tak tar chhuah nan te,Mi intihhmingchhiat nan te leh invau nan te an hmang thin. Heng zawng zawng hi dan bawhchhiatna sual lian tham tak a ni a, Social Networking hmangtute kan fimkhur a ngai tak zet a ni.

Social Networking athu kan post leh comment te hian Jail (Lung in) bang min zuttir thei a, pawisa tam tak pawh kan chawi thei a ni. Chung langsar zualte chu:-

(a)      Mahni nihna ni lova “Fake Account”siamin Jail-ah tantheih a ni.

(b)      Sorkar hotu, Minister, celebrity leh mi tute pawh dawt a intihmualpho tuma sawichhiatna leh sawiselna thu post leh comment in lung-in tan theih a ni.

(c)       Sakhaw dang deuhsawhna leh sawichhiatna lam post leh comment in lung-in tan theih a ni bawk.

(d)      Mi tute pawh tawngkam mawi lo tak tak a “Zawngsen, Hmela, Uirenu, etc”tia thu post leh comment in lung-in a tan theih.

(e)      Dan in thiamloh a chantir hma a, Sorkar hnathawk leh politician-te “A eiru” tih tawngkam post leh comment in lung-in a tan theih bawk.

(f)       Mi rilru tina thei thlalak leh video thawn darh in lung-in a tan theih.

(g)      Midangte tana hmuh nuam lo, saruak leh ruang thlalak leh video thawn darh in lung in a tan theih bawk.

(h)      Zahmawh rawngkai leh invauna lam pang thawn darhin lung-in tan theih a ni.

Social Networking kaltlanga thu kan post leh comment dawnin he zawhna hi in zawt hmasa thin ila – He thu ka Post emaw Comment avang hian keimah leh ka chhungte tan thil tha lo a thleng thei em? Dan bawhchhiatna a ni em? ” tiin in zawt hmasa ila, “AW” kan ti anih chuan post emaw comment loh ngam tur a ni.

MOBILE TOWER LEH MOBILE PHONE RADIATION
Radiation kan tih hi a nihna takah chuan Electromangnetic Field (EMF) a ni a. Kan lei (Earth) leh Ni (Sun) te pawh hian radiation a pechhuak reng a, mihring siam chawp radiation entirnan- Electric tower, Radio tower, Microwave tower, TV tower, Mobile tower, Mobile phone etc. te pawh hian radiation an pechhuak reng bawk a ni.

Tunlai kan buaipui ber pakhat chu Mobile Tower leh Mobile Phone atanga Radiation lo chhuak hi mihring tan a pawi leh pawi loh chung chang hi a ni. Hemi chung changah hian inhnialna tam tak a awm thei a. Mihring tan a hlauhawm theih dan a awm rualin, a hlauhawm loh dan pawh a awm bawk. Chuvangin mobile hmangtute leh mipuite kan fimkhur thiam a pawimawh hle a ni.

India ram khua leh tui, radiation laka, kan him theihna turin India sorkar chuan International Radiation Norm aiaza-zel-a-sawm (10%) in a tihniam a, entirnan GSM mobile tower atanga radiation energy a pek chhuah theih chin bituk 4.5 watt per sqm (900 Mhz) kha 0.45 watt per sqm a lo ni ta a, chutiang bawkin 9.0 watt per sqm (1800Mhz) kha 0.90 watt per sqm a lo ni ta bawk a. Hei hian a entir chu Mobile tower atanga radiation energy lo chhuak thin kha mihringte tan a hlauhawm nep zawk nan tih hniam tir vek an ni. He dan hi ni 1.9.2012 atanga hman tan tawh a ni a, Mobile operator-ten he dan hi an bawhchhia anih chuan tower tinah cheng nuaih nga (Rs. 5.00 lakh) chawitir theih an ni.

Kan hriat reng tur chu Mobile tower chauh hianradiation energy a pechhuak lova, Mobile phone pawh hian radiation energy a pechhuak ve reng a ni. Mobile phone te leh kan taksa hi hnaih chilh taka dah anih thin avangin mobile phone atanga radiation energy lo chhuakte leh kan taksain radiation a hip luh dan hi SAR (Specific Absorption Rate) hmanga teh ani thin. Mihring tana hlauhawm lo tur chin ICNIRP (International Commission for Non Ionizing Radiation Protection) hian SAR hi bi tuk a nei achu chu 2 watt per kg (average over 10 grams tissue) a ni. Mahse India ram mite himna tur zawkin India sorkar chuan International norms aia hniamin Mobile phone tinah SAR hi 1.6 watt per kg a bi tuk a, he dan hi ni 1.9.2012 atang khan hman tan a ni. Tunah hian Mobile phone ram chhunga siam leh lakluh (import) reng rengah SAR hi 1.6 watt/kg aiin a sang tur a ni lo a, mobile handset zawng zawngah pawh tarlan vek tur a tih a ni bawk. Tuna i Mobile handset pawh kha en la, a sang aiin a hniam lam pang a tha tih hria ang che.

A hlauhawm dan leh hlauhawm loh dan:

(a)    Radiation energy in mihring a chhun reng chuan a hlauhawm thei dan a awm a. Amaherawhchu, Mobile tower   kan in chunga an bun avang khan a hlauh awm tihna a ni kher lo. A hlauhawm dan chu Mobile tower-ah khan RF Antenna a awm a, chu chuan nangmah epchiah khan, 20 metre aia hnaiah, rawn hawitir sela, mihring tan a hlauhawm thei. Chupawh mihringa a lanchhuah hun tur chu kum 8-10 vel bawr-ah a ni ang. Mobile tower an dahna in (house) aiin antenna in a chhun building metre 20 aia hnaia awmte tan a hlauhawm zawk. Mobile tower antenna leh kan awmna inkar hlat zawng hi hetiang aia tlem a ni tur a ni lo:

Antenna Hawizawng in ang                            Antenna atanga Building hlat zawng

1 Antenna                                                      20 Metres

2 Antennas                                                     35 Metres

4 Antennas                                                    45 Metres

5 Antennas                                                    55 Metres

(b)    Mobile Phone inbiak nana hman nasatin a hlauhawm thei. Nikhatah minutes 18-24 aia tam hman loh hram tur a ni.

(c)    Mobile signal that vak lohna hmun atanga kan biak hian kan mobile handset atangin radiation energy a pechhuak hnem zawk. Chuvangin mobile signal thatna hmun atang chauh a Mobile handset hman hram tur.

(d)    Mobile Phone inbiak nan beng bula dah aiin head phone hman emaw loud speaker a dah a him zawk.

(e)    Medical implants nei tan Mobilephone kha 15cms aia hnai lo ah dah hram hram tur.

(f)     Land line hman tur a awm chuan hman hram hram a tha zawk bawk.



BIO-METRIC IDENTITY CARD:
Bio-Metric Identity card chung chang hi Mizoram ah kan buaipui hle, mi thenkhatin sakawlh chhinchhiahna anga ngaiin zirtirna dik lo an kalpui mek a. He chhinchhiahna hi sakawlh chhinchhiahna ni lovin, India ram khua leh tui nihna neite chhinchhiahna tura tih a ni. India ram hian a khua leh tui chhinchhiahna tha a neih loh avangin ramdang mi tam tak tunah hian dan lo angin India ram chhungah an awm mek a, chungte chuan harsatna leh buaina a ram chhung mite a siam nasa em em a ni. Dan lo anga ram dang mi awmte hian sumdawnna lian tham tak tak an nei reng a, chungte chuan kan ram thau an sawkhek a, heng avang hian kan ram-economy in a tawrh phah nasa em em bawk a ni.

Tin, ram chhung mite chhinchhiahna tha kan neih loh avangin thilsual titute (dan bawhchhetute) man chhuah an harsat phah thei bawk. Ram changkang – US, UK, Canada, Japan, etc. ah te chuan an ram mi-leh-sa te chhinchhiah nan Bio-metric identity an hmang a, tu emaw in tual that se awlsam takin an finger print atangte in an zawng chhuak zung zung thei thin. Entirnan dan lo angin US-ah te lut ta ila, dan ang thlapin hnathawh tur hmuh theih a ni lova, dam loh nikhua pawhin hospital pangngaiah in entir theih pawh a ni lo, a ram pawh chhuahsan leh dawn ila man hmabak kan ni ringawt mai a ni. Hetiang hian kan ramah te hian ti ve thei tawh ila chuan kan ram thenawm – Pakistan, Bangladesh, Myanmar, leh Nepal a tangte hian dan lo angin an lolut lo tur a ni. Lo lut pawh nise ram mi-leh-sa nihna an hauh thei lo tur hi a ni a. Hei hi a bul berah chuan ram khua leh tui chhinchhiahna tha kan neih loh vang a ni.

Tunah hian misualte finger print chauh Police-ah neih a ni a, rukruk leh tualthah chung changah misual hnu chhui dawnin an finger print lak a ni thin. Mahse misual finger print kha an neihsa nen a in mil loh chuan zawn chhuah a harsat phah thin. Ram chhung mi-leh-sa te finger print neih vek anih erawh chuan awlsam takin an finger print atangin misual hnu chhui a awlsam phah dawn a ni.

Mizoram chhunga cheng zawng zawngte Bio-metric identity hi neih vek nise chuan tuna kan harsatna a ram mi-leh-sa chhinchhiahna felfai tak kan neih loh avanga buainate hi sutkian a ni ang a; tin, misual hnu chhui a ti awlsam bawk dawn a ni. Hei hian ram leh hnam humhalhna kawngah nasa takin a pui thei dawn a ni.

Kan ram leh hnam humhalhna tur hian tuna Sorkar-in a kalpui mek Bio-metric Identity Card hi theih ang tawk a lo tawiawm theih turin ka han ngen duh che u a. Mi thenkhat tute emaw avanga Bio-metric Identity Card hi sakawlh hmuha hmu lui tlat kan awm avang hian Bio-metric Identity Card hmalakna a thuanawp phah thei a, hemi avang hian ram dang mite nena kan inthliar hranna tur kawng a tibahlahbakah misual hnuchhuina kawngah harsatna min thlen thei a ni tih hre reng chungin tan ila tlang ang u.

A TAWPNA:
Sawi tur tam tak awm mahse kan sawi vek seng lo, chuvangin kan booklet semah khan chipchiar takin cyber security leh social media security chung chang tarlan a ni a. Kha kha lo chhiar vek turin ka han chah duh che u a. Booklet nei ve lo tan pawh website http://dict.mizoram.gov.in ah download theih a ni. Tin, booklet-a tel ve lo Mobile tower leh Mobile phone radiation chung chang leh Bio-metric Identity chung chang hi tun tumah hian a pawimawh em avangin kan han sawi tel a, booklet chhiartute in mi hriatthiamna ka han ngen duh bawka. Heng kan thu sawi chungchangah te hian eng emaw hriat thiam loh emaw hriat belh duh nei kan awm anih pawhin a hnuai address ah te hian han zawh fiah theih reng a ni.



Contact us:

Pu Lalthlamuana Khawlhring,

Chief Informatics Officer,

Department of ICT, Govt of Mizoram

Third Floor, Secretariat Building Annexe-I

Aizawl – 796001, Mizoram.

email: muana.mizo@gmail.com

Facebook: https://www.facebook.com/lalthlamuana.khawlhring;

Whatsapp: 9436140113