Duat tih hi mizote hian hmangaihna leh duhsakna sang ber ah kan ngai thin a, a dikna chin awm bawk mahse, tur (poison) kung leitha vura tui pek a anna chin a awm thei fo thin.
Mikhual leh inleng kan lo ngaihsaka kan theih ang tawka ei leh in, mutbu, an khawsak vel dan leh awlsam tur zawnga duat theih erawh a hluin a mawi a, mi puitling leh zahawm kan nih theihna kawng khat pawh a n ve renga. Mizote hian khual chhawn leh lo duat vel te hi kan neihten a la tlinlo bakah, hnam pui zawkte ang chuan kan la thiamlo hle niin a lang. Tun tuma sawi ka tum tak zawk erawh chu kan laina hnaivai, kan nupui/pasal, kan tu leh fate duat kan tum dan zawk hi a ni.
Kan lengzem hla pakhat ah pawh "Run hmun kan len hunah chuan ka duat viau ang che" tih te pawh a awm kha. He hla phuahtu hi, a bialnu hi a fel chi a nilo anga an induat sual ang tih ka hlauhthawnpui khawp mai, 'Hmeichhia vau loh leh vau sam loh chu' an tih kha a la dik tluang zel si a.
Induat hi hmangaihna lantirna sang ber anga kan la ngaih tlat avangin kan fate duh zawng apiang tihsak zel kan tum a, Naupang te an nih lai atangin tap chunga an ngen tawh phawt chu an ha muatna tur te, an pumin a ngeih loh tur te, an hriselna leh an hmasawnna ti khawlo thei pawh nise, kan ti hlawhtling zel a. Mi inla changkang thenkhatte tih dan la in, ‘mate/bawihte’ tiin kan in ko duat hliau hliau va, an duhzawng buaipuiin kan phi ruai thin. Duatna hian rilru pangchanna leh nona a then thei a, an rilru a pachan loh phah ang tih reng kan ngaihtuah pha ngailo va. An taksain a mamawh pawh nilo an ei chak apiang an tana tha emaw, thalo emaw, tih hlawhtlin zel kan tum thin. An lo lenkan deuh hnuah pawh an men peih chen chen men kan phalsaka, an duh chen chen kan mut tira, lehkha an lo zir peihloh pawn kan phun lungawi ve leh mai thin. Sikula an mamawh aia tam pawisa kan paitir a, a lo rei deuh hnu chuan kawng diklo zawh phahnan an lo hmang leh mai thin a ni. Naupang an pi leh pute bual a khawsa chu an pangchang duh an tih thin pawh hi an pi leh puten an mahni rila rah an fate aia an duat zawka, an fate tana an phal loh bur thin pawh an phalsak zel thin vang leh an rilru a nem leh duai thin vang a ni fo.
Fate hmangaiha an hmakhua tur thlirpui thiam te chuan duat tih hi an dah lal ber ngailo va, an nun thalo an sim theihna tur a ni phawt chuan tiang chelek pawh an hreh ngailo. An fate duhzawng ringawt ni lovin, ei leh in tha, an hriselna, an silh leh fen, an zirnate leh an rilru chhelnate an ngai pawimawh ber a. Sap ho kan tih mai khawthlang rama chengte chuan an fate tlem a an lo leikan deuh hnuah chuan mihrang en takin an en a, chu chu an hmangaih loh vang ni lovin, an fate an lo puitlin theiha, an hma khua an in sut khuak theih nan a ni. Anni ho inenkawl dan ang siar siara inenkawl chu kan dinhmun leh kan khawsak phung in a pha lovin a lo inrem chiahlo ang tih hriat erawh a tha.
Duat tih hi a titu lam rilru nona rah chhuah a ni a, kan rilru hlimna leh kan lungawina kan dah lal ber avanga kan tu leh fate duh ang apiang tihpuitlinsak kan tum tlat vang a ni fo thin. Fate duat ngiak ngiaka, fate duhzawng leh nuam tihna ringawt dah lalsaka enkawl thin tute aiin chhel tur leh fel tur zawnga hmangaihna nena enkawl thin tuten fate an chhuah puitling zawk thin fo tih erawh hmuh tur leh hriat tur kan haihchham hauh lo ve. Chuvangin, duatna(affection) aiin an hma khua tana duhsakna dah lal thiam zawk nachang hre turin nu leh pa tinte kan inzir a hun ta hle a ni. //
