HPC(D) TEN CHEMPHAI AH CHHIAH AN KHAWN LEH

HPC(D) te chuan Chemphai Leilet a awm Vaite hnenah chuan Dt 2.9.2014 a cheng nuai li pe tura an lo hriattir tawh chu an la pek loh avangin Pathianni zing khan Chemphaiah kal chilhin pe turin an hriattir nawn leh a, Leilet neitute inhmukhawm chuan an manganna hi Home Minister hnena thlen an rel a ni.

Ni 2.9 Thawhlehni chawhnu dar 2 khan HPC(D) nia inchhal mi pali chu 207 var hmang in Chemphaiah an kal a, ni 12.9.2014 ral hmaa cheng nuai li pe turin Chem-phai leileta thawk vai hnenah an phut a. Chemphai leileta thawkte hian pek tumin an theih ang anga khawn khawm an tum laiin, Police lamin pe lo tura an tih avangin an pe ta lova. Mahse, tun Pathianni zing khan HPC(D) lam chuan Chemphaia kalchilhin, pe turin an ti nawn leh ta ni a thudawn a ni.

Hetianga HPC(D) in pe tura an vau avang leh Police lamin pe lo tura an tih si avangin leileta hnathawktute chu an mangang hle a, tam tak chu Chemphaia awm ngam lovin an ram lamah an haw tawh a. Tam tak haw tum an la awm mek bakah a la awm tam tak chu mahnia riak ngam lovin an riak khawm thin nia sawi a ni. Hetianga leileta hnathawka an chhawrte dinhmun khirh tak an din avang leh, hnathawktu nei lova an haw zawh mai an hlauh avangin Chemphai leileta thawkte hnena HPC(D) nia inchhalten donation an khawn chungchang ah Bilkhawthlir Agricultural Development Association huaihawtin, BNRGSK building Bilkhawthlir North-ah leilet neituten meeting neiin hmalak dan tur an sawiho a. Meeting hian an harsatna te a rang lama Home Minister-a thlen phawt nise an ti nia hriat a ni.

COMPLAINT BOX HUNG DAWN

Kolasib District Hospital-a District Medical Superintendent Dr Ngurbiakveli hova Doctor te thukhawm chuan OPD ah mipui ten an vuivaina an thlen theihna turin Complaint Box hun an tum a, Complaint Box hi thla tin hawn tura ruahman a ni.

Chief Secretary thar ruat a ni

Mizoram Chief Secretary Pi L tochhawng chu October thla ah a pension dawn tak avangin Pu Lal Malsawma, IAS chu Chief Secretary thar atan ruat a ni.

MIZORAM LARSAP THAR LALUT

Meghalaya Governor ni lai Dr. Krishan Kant Paul chu Dt 16.9.2014 tlai khan Mizoram Governor thar atan Raj Bhavan Durbar Hall ah lakluh a ni.

Social Welfare Organisation ding dawn

Bairabi khua in tun aia hmasawnna rahbi a rah theihna tur a nih beiseina leh thalaite/zirlaite puitling zawka inchherchhuahna tur a nih beiseiin Bairabi Social Welfare Organisation din tum a ni.

Helama rilru pe hmasa leh ngaihtuahna sengtute chu Dt 17.9.2014 zan khan inhmuhkhawm a ni a. Bairabi khuaah hian hetiang pawl hi din ngei tha an ti a, pawl din a nih hma hian Pawl kal dan tur te, a tum leh a innghahna tur te zirchian hmasak nise, zirchianna leh pawl din tura tul te lo ngaihtuah turin mawhphurtu tur an inruat a, official taka din hun tur chu kumin 2014 kum tawp lam nise tiin an rel.

He pawl hi zau tak leh chak taka a kal theihna turin khawtlang huap leh mi zawng zawng, a duh apiang huapzo tura puanzar tha an ti a. Khawtlang hruaitu, VC te leh tlawmngai pawl hrang hrang te hnenah sawmna leh hriattirna pek nise an ti bawk.

He pawla tel tur leh thahnemngai taka tel a, thawk turin Bairabi khawtlang mipui zawng zawng te an sawm.

JERC, Consumer Awareness Campaign nei

Joint Electricity Regulatory Commission(Manipur & Mizoram) huaihawtin, 16.9.2014 khan Synod Conference Hall, Diakkawn-ah 'One Day Workshop on Electricity Consumers Awareness' neih a ni a, Kolasib District chhunga Sorkar hotu lu te leh NGO te kalkhawm-in, kawlphetha hman chungchanga hriattur pawimawh te inzirtirna neih a ni.

Workshop hmanpuitu A.Chhawnmawia IDES(Rtd.), Member JERC(Manipur & Mizoram) chuan inlawmna thu sawiin, khawvel changkang zel-ah kawlphetha chu mihring nun kaihruaitu ber anih thu leh renchem taka hman anih loh chuan mihring te bawkin an tawrh thin thu a sawi.

Sorkar laipuiin Jt. Electricity Regulatory Commission chu State tin-ah din tur anih rualin, Mizoram leh Manipur chu remchan zawkna avangin dahkawp an nih thu a sawi a, an hnathawh ber chu Power & Electricity Department te hnathawh tur duan sak te, regular taka êng an pekchhuah theih nan hmalak te, electric chhit man bithiah siam te leh kawlphetha chungchanga dan leh hrai mipui te leh sorkar hman tur sia te anih thu JERC Member chuan a sawi a ni.

Hun hmanpuitu dang Kolasib Addl. D.C Lalfela Sailo pawhin thusawiin, JERC(M&M) ten Kolasib-ah hetiang programme pawimawh an buatsaih chu lawmawm a tih thu a sawi a, Mizoram District dang te aiin Kolasib District chu kawlphetha hmu tha kan nih avang te, êng chhit chungchangah zirtirna mamawh ber kan nih avang te in Workshop chuan malsawmna a thlen ngei a beisei thu a sawi a, kalkhawm te chu midang hnenah an thil hriat te sawichhawng ve zel turin a beisei thu a sawi bawk.

Kolasib P&E E.E. Er. R. Romawia chuan kalkhawm te zirtirna pe-in, Mizoram leh Kolasib in kawlphetha kan mamawh dan te leh an hralhchhuah dan hrang hrang te a tarlang a, Central sorkar in thla tin phai lam atangin Mizoram chan tur Power 103.1 Mega Watt a tih laiin, kan hmuh tam ber-ah 80-85 MW vel chauh anih thu te leh tun dinhmun-ah kan power mamawh 0.6% chauh kan la siamchhuah chauh thu te a sawi a, "In ren tak chungin kan êng ve hram hram a ni" tiin a sawi. Kolasib District chuan thlatin Power Mega Watt 7.08 kan mamawh thu te, kum 2013-14 chhungin Kolasib Power Division hnuaiah Electric connection 16,804 vel kan awm mek thu te, electric hralhna atangin Rs. 11,13,02,809/- chu sorkar revenue-ah chhun anih thu te E.E hian a sawi bawk a ni.

Er. H. Thanthianga, Asst. Chief(Engineering) Member, JERC(M&M) chuan electric bill an siamdan hrang hrang te chipchiar takin, slide projector hmangin kalkhawm te hnenah zirtirna a pe bawk a, hemi hnu hian zawhna chhanna hun hman a ni bawk. Kalkhawm te hian zawhna hrang hrang an zawt bawk.

He workshop-ah hian Bairabi Chhimveng Branch YMA hruaitute chu sawm an nih angin an tel.

Mega Block chungchangah meeting nei dawn

Silchar-Lumding Broad Guage Rupayan Sangram Committee, Barak Valley, Assam chuan 1st October 2014 atanga 31st March 2014 chhunga rel kawng lian siam tur avanga rel kal loh tur chungchangah; huntiam chhunga rel kawng lian siam zawh a nih ngei theihnan te, rel kal loh chhunga tangkai taka hman a nih theihnan NH No.6 a rang lama thawmtha tura sorkar ngen te, Silchar-Haflong road siamthat hna te, rel kal loh chhunga tui kawng lama inkalpawhna tha siam tura sorkar ngen te, mipuite mamawh ang motor (Bus) ruahman tura sorkar nawr te, rel kal loh chhunga ei leh in hniang hnar tak a awm reng theihnana chhekkhawl dan tur chungchangah September thla tawp lamah hian Silchar District Library Auditorium ah meeting an nei dawn. He meeting-a tel tur hian State pathum; Mizoram, Manipur leh Tripura atanga State aiawh te tel turin an sawm.

Mipuiten engnge kan tihtur? - Nono-i Pa

India ram mipui rorelna ramah hian mipuite hi kan chep ta em? Inthlang ram, sorkar chu mipui ta ti chung si hian sorkar hotu leh thuneituten an duh dan dana an kaihkual theih mipui kan ni ta em? Hotu leh roreltute thu thua awm tur kan nih rualin mipui hian kan chanvo kan chang tur a ni.

A tu amah indemna lam a ni law, mawlmang taka ka thlirna tlang atang hian ka thlasik mau chang puah ve phawng mai chauh a ni e.

Bairabi khuaah kar khata tui vawi 2 a haw thin chu vawikhat chauh haw tawh tura sawi thawm a awm a. Tin, kumkhaw tlai tluana zing lamah emaw tlai lamah emaw tui haw thin kha tukthuan eikhamah tih haw thin a ni tawh te an ti, Department lam remchanna avangin!

Mipuite kha au ta che u, kuthnathawk nitin inhlawhfa chawp emaw a ei zawng te khan tukthuan eikhama tui a haw chuan chhungkua in buai vek kha, tui nghei hlauh vangin hnathawh thulh chang a awm fo in ti a ni lawm ni?

Tui pipe a chhia a, tu mawh mah a ni lo. Khuarel chhiatna lo thleng a ni. Mahse, a siamthat lamah erawh mawhphurtu an awm. A changtu Department te hi mipuiten tui an nghei ai chuan hmanhmawh phelenga chhun zan zawma thawk turah ka ngai. (Zan hi chu ka phut tak tak lo a nia) Tin, khawtlang hruaitu VC te hian thuneitu sang zawka thlen mai lovin a nawra nawr leh a tul ang ang ruahmanpui hi an tihturah ka ngai bawk.(An tih leh tih loh phei chu ka hre lem hlei lova, an ti reng a nih phei chuan lawmthu ka hrilh nghal e) Chutiang bawkin, YMA leh NGO dang dang ten, “Enge chanchin, engtianga hma lak zel tur nge...” tia vir sek turah ka ngai bawk.

A chhan chu, tui tel lovin ni khat pawh kan nung thei lovang, heng zawng zawng hi khawtlang tan leh a chhunga cheng mipuite tana kan tihtur ni ah ka ngai. Hetianga kan tilo a nih chuan mipuiten harsatna kan tawk reng ang chu.

Mipuiho, in thlavang ka’n hauh avang khan in lo pawr ngawt ange, hetah hian lo infiah ve phawt teh u.

Inrinni apianga sa lei thei, incheina leh lirthei etc. tha tak tak nei thei, ka’n la tihbelh teh ang, tlai tina zu inna nei thei khan kar khat chhung tla tur tui dahkhawlna kan siam/lei thei lo maw? Harsatna tawk tur reng chu kan ni lo maw!!?

Enteh, Tlawngah Balu duh tawk tawka tam lak tur a awm a, cement leh brick man tur chu a tam lutuk dawn em ni? Sintex (an tia mi kha..) te pawh chuti em ema man to a ni dawn em ni? Bairabi in fur laia tui kan nghei ziah mai hi a zahthlak, van malsawmna ruahtui dawhkhawlna tur tal chu i lo intum chawp ve ang u. Sorkar sem i nghah chhung chuan kumtin tui i ngeih ziah dawn tihna a ni mai a..

Ka tui laklawh tlat, ka’n sawi kai hram teh ang. Electric Bill sang te hi phun phun tur kan ni chiah em? Khaw luma awm kan nih avangin fan chu a vir nileng zankhua a ni maithei e, zan lama kan awm lohna lam apiang light off te hi chin dawklakah i nei ang u, chhun pachan laia verandah light in ‘ON’ vu reng te kan la awm ania. Tin, TV hma ah te hian kan thu tam lutuk a ni lo maw?

Dik taka sawi chuan Energy Meter diklo leh Bill tihsual palh te chu a awm thei nameuh mai. Mahse, kan hmandan atang hi chuan kan chawi awm tawk te te hi kan chawi niin a lang, Department lam hian a ruka kan hman Heater watt sang tak tak te hi min la bill tel lo mah mah..

Engpawhnise, kan thupui atangin kan peng thui ta mah mah.

Khawtlangin, mipuiin harsatna lian tak kan tawk anih chuan i au chhuak ang u. A thlenna tur hmunah te i thlen zel bawk ang u. Kan hruaitute; VC, NGo’s etc te pawh i nawr ang u, anni kaltlangin department pawh i nawr ang u, mahse chhan tha tak leh dik tak zelin aw.. Chutianga kan tih a kan hlawhchham a nih chuan kan hruaitute pawh i thlak ngam ang u.

Mahse, kan hriat reng tur chu maw.. Harsatna chi hrang hrang hian chhan a nei vek. Keima tih ve tur ka ngaihtuah piahlamah, “Kei ni ta ila, an dinhmunah ding ta ila, eng tin nge ni ang” tih thlir chungin mahni phak loh tur leh theih loh turah midangte, kan hruaitute i beisei sang vak lovang u.

A tawp ber atan chuan Tangrual chauh nilovin, lungrual takin Bairabi khawtlang tan tan i la thar deuh deuh ang u.///

Rinawmna : Dt 20.9.2014 YMA THIAN Editorial

Mizote hi pi leh pu hun atanga hnam rinawm, thingfaka kawngka do mai duhtawk thin kan ni. He kan hnam zia duhawm tak hian zamual a liam mek niin a lang.

He kan ze tha tak bo pil mek hi engvang nge ni ang le? Chhan tam tak a awm thei awm e. Hnam dang nena kan inchiahpiah nasat vang te, hnathawk peih silovin mi neih ang neih ve kan duhna avang te, mahni hma kan sial lutuk vang te pawh a ni thei ang.

Hun engemawchen atang khan kan khawtlangah rukrukna sual sawi tur a awm ta fova. A pawi hle mai.

Tun hnaiah Bairabi Rel Station Bazar dawr engemaw zat rawk a ni a, khawtlang huap chauh nilo ram tana hnawthawktu Company lam bungraw bo thu te pawh hriat a ni ta fo mai. Chu chang ni lovin sorkar pawi thleng khawih duhna thinlung puin thenkhat chuan rukrukna leh eirukna hi pawi ti miah lovin chhungkaw chawmnan leh eizawnnan kan hmang ta ni te pawhin a lang.

Hah taka hna thawk a, kan thawhchhuah mila hlawh hmu tura tih kan nih lai hian kuttlinglo mausamna rilru leh a hlawkzia te hi kan inzirtir chiah loh pawhin kan intihhmuh ta zel a ni mai lo maw??!! Kan sim vat atan a tha hle mai.

“Mi awkhrawl an hlawhtling rih thei, an tlu phut thin” tih te hi hre tharin chhungkaw tinah rinawmna leh dikna inzirtir thar ila, mahni zawnah theuh dikna leh rinawmna thu tiam tharin tan i la thar leh teh ang u.//

MATRICT EXAMINATION CENTER KAN NEI TA :

 MBSE memo no-MBSE/EX(H)2/2012/278. Dated Aizawl,the 11th september 2014 Chuan Bairabi H/S chu Matric Examination Center a tan a pawm ta.

Bairabi center-ah hian feeder school, Meidum Secondary leh Suarhliap Secondary te an awm a, CSK (Chuhvel, Saikhawthlir, Kananthar) erawhchu school establishment permission an neih loh a vangin, feeder nilovin, Bairabi H/S hmingin an exam thung dawn a ni.

Tun a alan dan chuan naupang hi 64 vel an ni a, mahse cl-x admission tithar an awm zel avangin an pun chhoh zel rin a ni.

Center nei thei tur hian dan ang chuan a tlem berah naupang candidate 100 tlin a ngai a, mahse kan dinhmun leh kan mamawhna te hriain center hi MBSE hian min pe ta tho a ni.

Center tha tak ni turin kan bei anga, kan phak bakah chuan Department pawn min hrethiam theiin a rinawm. Zirlai naupang, zirtirtu leh khawtlang mipuiten he kan hmasawnna rahbi hi rap pial lova, rahbi thar kan rah belh zel theihna turin i tang sauh sauh teh ang u.

Annual Sport nei

Gov’t Bairabi High School chuan Dt 16.9.2014 - 19.9.2014 chhung khan Annual Sport an hmang. 

Conference kal tur In report theih

YMA General Conference 2014, chu Dt 30.9.2014 - 2.10.2014 chhungin Ratu ah neih a ni dawn a.

Bairabi Chhimveng YMA Member, Conference kal tum te chu Branch YMA Secretary Pu B.Lalnunkima hnenah in report tur a ni.

Bairabi North Branch YMA Member Conference kal tum te chu  Dt 25.9.2014 ral hma ngeiin Branch President Pu Lalbiakenga hnenah in report tur a ni a, in report rual hian sumo fare Rs 200/- thehluh nghal tur a ni. In report lo leh sumo fare tur chhung lo te chu conference kal a remchang dawn lo a ni. Conference kal YMA member ten mahni mamawh chi hrang hrang ; Mutbu etc. intum theuh tur a ni.

Zampuimanga Group YMA Zaipawl Member te chu Gen. Conference-ah hian kal vek tura beisei an ni. Zaipawl Member Conference kal tum te chu; Bairabi North-ah Pu Vanlalfela, Secy. Gr. YMA hnenah, Bairabi Chhimvengah Pu H.Vanlalbika, President Gr. YMA hnenah Dt 25.9.2014 ral hmain in report tur a ni.

Dt 30.9.2014, Thawhlehni zing dar 3:30 ah Bairabi atanga chhuah tur a ni ang.

Inkhawmpui hmang mek

Dt 20-21, September 2014 chhung hian Bairabi Pastor Bial Senior Department & Intermediate Department chuan Inkhawmpui vawi-24 na Meidum Kohhran Biak In ah an hmang mek.

Catholic Kohhran NPSS pawhin Dt 19-21, September 2014 chhung hian Kawnpui-ah Zone-V Parish Sunday School Inkhawmpui an hmang mek.

Pipeline chhia la siam zo lo, mipuiin harsatna tawk nasa

Bairabi Water Supply Scheme hnuaia khawtlang chawmtu Chengkawl Lui tui lakna, ruahsur leh leimin in a tihchhiat chu tun thlengin siam zawh a la nilo nia hriat a ni.

PHE tuilakna pipe chhiat avang hian khawtlangin harsatna nasa tak an tawk a, pipeline chhia siamthat hna zawh thuai a nih theihnan hian Bairabi North & South Branch YMA te pawhin Department an lo pui tawh a ni.

DC hovin Meeting nei

Dt 18.9.2014, Ningani khan Bairabi PWD I B ah Kolasib DC Jitender Yadav hovin Department hotute leh khawtlang hruaituten NH-154 siam mek chungchangah meeting an nei.

He meeting ah hian Compensation fello avanga kawngpui siam meka harsatna awm te sawiho a ni a,  Dt 22-26.9.2014 chhung hian sorkar hotute leh khawtlang hruaituten Joint Verification neih nise, a tul ang ang tihfel theih a nih chuan November 2014 chhunga zawhfel hman tum tura hmalak a nih dawn thu dawn a ni.

Doctor Training

Primary Health Centre, Bairabi Medical Officer Dr Lalengzauva chu Dt 18.9.2014, Ningani khan Registration of Birth & Death & Medical Certification of Causes of Dearth chungchanga Training in Aizawl a kal.

Dawr rawk

Dt 13(14), September 2014 zan khan Lalrimawii(Mapuii) W/o PC Chuauhmingthanga thawmhnaw dawr Rel Station Bazar chu tu tih hriat loh ten an rawk.

Dawr rawk a nih thu hi Thawhtanni zingah hriat a ni a, hemi ni hian Bairabi Police Station-ah FIR thehluh nghal a ni a, tunah hian Police in an chhui mek.

Dawr rawktute hian in hnung lam dap bang chu tichhia in an lut a, mipa leh hmeichhe bun chi pheikhawk bun 23 vel, hmeichhe naupang kawr fual, mipa kekawr, kawr hnuai leh kekawrte engemawzat an la nia hriat a ni. Misualte hian Pi Mapuii dawr thenawm pawh luh tumin an bei nasa hle nia hriat a ni a, bang an tihchhiat theih loh vangin an lut lo nia hriat a ni.

Rel Station-a dawr neitute hian rawk an tawk zing hle tawh a, thawmhnaw dawr mai bakah thingpui dawr, chawhmeh dawr etc. dawr 6/7 laiin rawk an tawk tawh nia hriat a ni a, heng thil sual titute hi tun thlengin man chhuah an la ni lo nia thu dawn a ni.

Dt 7.9.2014 khan Lalremmawii D/o PC Lalthangvela Cosmetic dawr chu rawk a ni a, bungrua thahnem tak an ru chhuak a, vanneihthlak takin he dawr rawktu mi 2 te hi chu Police ten manchhuakin thubuai siamsak an ni.

YMA General Conference vawi-69 na Ratu ah nei dawn

YMA General Conference vawi-69 na chu Dt 30 September-2 October 2014 chhungin Ratu ah neih a ni dawn.

YMA General Conference vawi-69 hmang tur hian Zampuimanga Group te leh Group huamchhunga YMA branch hrang hrang te pawh an inbuatsaih mek zel a, Bairabi atang pawhin member engemawzat kal tura beisei an ni.

Zampuimanga Group Executive Committee chuan Group YMA hmingin Bus hman nise, Bairabi North & South Branch te leh Pangbalkawn Branch YMA ten Sumo pakhat theuh thawhchhuahpui se tiin a rel a, tunah hian conference hmang tura kal tum te an in report mek niin thu dawn a ni.

Zampuimanga Group te hi Chalfilh, Zawlbuk, Tuiphai, Awithangpa, Pangzawl leh Chhhimphei Group te nen Counter No.5, Ramhlun vengah thleng ho tura ruahman a ni.