Puanzarna leh ngenna :

Hei, YMA THIAN Chanchinbu Bairabi Chhimveng YMA ten kan han tichhuak ve a. Hlutsaktu engemaw zat kan awm ve zel te hi a lawmawm a, Bairabi khaw chanchin hre ve duh, a chanchinbu phek chhiar phak lo tan pdf file https://www.facebook.com/groups/bairabiyma/ Group-ah upload thin a ni a, tlema a buaithlak deuh avangin kan tangkaipui ngei beiseiin ymathianbbis.blogspot.com hei hi buatsaih a ni a. Hetah hian Bairabi khaw chanchin thar leh khawtlang tana pawimawh ang chi te dah thin a ni ang.

ymathianbbis.blogspot.com hi : Lo en ve chhin teh le.

Thuziak : 2014 INDEPENDENCE DAY TOURNAMENT KHA - Mapuia Nu Chawngthu

Kumin atan a vawi khatna tur Football, Badminton, Volleyball tournament chu kan en zo leh ta reng mai a! A ropuiin infiam mite leh infiam ngainatute tan chuan a va khamawm loh tak em, pui tak a ni.

Kan infiam mi thenkhatten kum khat vel emaw, he hun atana lo practice a, taihmak chhuaha an lo beih tang tang na rah chu mipuiten kan lo thlir a, nep lo tak chu an lo ni e. Tu pa fiamthu ang deuhin thenkhat lah tournament hma a kar khat vel la awmah in la Fit hmuh tur awm zeuh zeuh mahse an la tha tho tho. Hetiang ang em hian a ni maw kan thalaite hian an lo thiam ni! tiin ui takin kan thlir liam leh ta chu a ni a. Eng tikah tak thlir zawm leh ang i maw..??!!

Kan infiamna tual zawl lah, phul lem ngai miah lo phul tak ngei maiah an han in khel a (a bikin Football), Ballboot nge tih pawh hriat loh an tukhum zawnah chirh hlawm lian pui pui a in vawrh kang ang nul nul a. Dangmawn phe hlawm hlawmin ‘A kotlang A team ten’ Berbek(Chabet) kai thip sep sep pawh pawisa lovin kan tan zawngte kan han au tuar tuar a.....pui dum dum tak a ni. Keini chhangchhe nufa lah bang lo, pakhat paw bawk, a sir tawn tawnah pawnfenah min uai bawk, tan zawngte auh tuar tuar ngai bawk, “A GOALLLLL...” kan han tih ve meuh chuan mawng chanve dawnah pawnfen elastic a lo tawlh thla tawh mai thin a, kan va han buai thin teh reng em!!! Chhangchhiat thlak bawk si, hmuhnawm bawk si, nuam bawk si hi a ni hawt mai. Ruahte chu sur raw sek sek, kan tlangvalten an thiam an show miau a lawm le. Mi khua aia an nepna chuang ka hre love, sawi sei lo mai ang, a hmuhnawm tho tho...

Engtikah tak tournament hi en leh ang i maw ? Tlumtea thlir takin kan thlir leh dawn a nih hi. Kan infiam mite thiamzia leh fit-ziate ka hmuh hian hei aia tumna sang zawk neiin tumruhna, chhelna, huaisenna leh insumtheihna te nen beidawng lova ram tan leh club tan a ni emaw  inkahchhuaha ei zawnna atan hiala hman tlak a nih ziate hi hre nawn leh awn awn mawlh teh se.

YMA  THIAN chanchinbu  Dated 2nd August 2014 chhuah 55na Editorial kha a tha thlawt!!

Ka lo vei ve em em leh ha hipa titi ko tlanga ka lo dahpui thin rawn ziah lan a ni a. Ni e kan infiam mite hian helaiah ringawt a thamral tum lo hian a aia sang zawk beiseiin inkhel hram hram ang u. In khelh thiam uihawm tak taka thamral tate uihawmzia hahipin kan sawi kan sawi tawh hi! Kan khawtlang a lo thianghlima, zu leh ruihhlo ten min eichhiat lohnan infiamna hi hei ai hian lo hluar zel se ka va duh teh reng em!! Vawina kan thalaite hi naktuka kan ram, kan khawtlang hruaitu turte an la ni si a.

Nu leh pa thenkhat chuan an fate tui zawng an tuipui ve loh avangin an faten a ni lo lam kawng an zawh a, harsatna leh buaina tam tak a lo thlen hnuah an fate thununa zilhhau an tum thin a, an ti sual chawk!! Chuvangin, Nu leh Pate paw’n fate tui zawng ngaihsak peih ila, a ni lo lama an kal hma ngei hian kawng dik zawhpui hram hram teh ang u. Doctor nih duh na na na chuan Architect a zirtui dawn si lo !! Khawtlang tinuama, ram hrisel leh ralmuang nei tur leh zu leh ruihhlo bawiha kan fate tang tur chhanchhuaka, chumi lam lo kawng zawh tir tur chuan nu leh pa te paw’n mawhphurhna sang tak kan nei . Thil tha tinrenga enkawl emaw kan intih laia thachuang lo te pawh an awm ve tho bawk a.

Engpawhnise, Independence day Tournament chu a zo ta reng mai a, nakum kan nghak leh mai dawn nge? Kan infiam mite lah inkhelh chakin an za et et mai si a, engtinge kan tih tak ang le? Fur ruahtui tlak tam vanglai paw’n min dang zo lo a nih si chuan, thal favang awllen hun a lo thleng leh ngei ang a, kan thalai tam tak infiam chaka phu zek zek te hi engtinnge kan tih tak ang le? Kan en liam mai mai dawn em ni ang??

Kan thalaite hi infiamna uarpui peih ang u. An tan kawng dik zawnpui ila, an tui zawngah khawtlang pawh nghing ve ngei sela, ram hruaitu leh khawtlang hruaitute pawhin naktuka kan khawtlang hruaitu tur te hi ngaihsakin khawtlang nuam siam tumin hma la teh ang u. Tuna kan thalaite lo chu nakinah khawtlang hruaitu tur midang kan nei dawn silo..//

Thuziak : Zirtirtu tha leh ropui?

Tun tum chu zirtirtute lam hawiin aw... Tu’n ngaihloh lamah kan lo ngailo a niang chu...

Kum dang ang bawkin September Ni 5 Zirtirtute ni chu ram pumah hman a ni a, he ni ah hian Zirlaiten an zirtirtute chawimawiin duhsakna leh thilpek an hlan thin.

Zirtirtute hi an va hlu em! Zirlaite leh mipuite hian chawimawina sang ber kan pek hian kan tihtur dik tak kan ti a ni. Zirtirtute hi awm ta lo se, engtinnge kan awm ang le? Chutihrual chuan, hetianga zirtirtute dinhmun sang taka kan dah, chawimawi na nopui kan hlan te hian chawimawi hi an phu reng em le?

Zirtirtute pawimawhzia leh tangkai theihzia chu inhrilhnawn kan ngai awm love. Anmahni zirtirtu ngei pawhin an hre turah ngai ang. Naupangte/Zirlaite nunkawng hruaitu, an puitlin hnua an nih tur ang nih tirtu chu Zirtirtute an ni. Khaw khatah mi thalo(misual) an tam viau chuan chu khua chuan zirtirtu an nei tha vak lo tihna a ni thei ang.

Zirtirtu thenkhat chuan Classroom-a zirtirna kan pek ringawt hi kan duty emaw kan ti ni maiin a lang. Tin, a then phei chuan hlawh hmuhnan chauhvin Zirtirtu hna hi kan thawk ni te pawhin a lang.

Zirlai naupangte hian an zirtirtute hi an ring em em a ni. Nu leh pa thusawi ai pawhin an Zirtirtute thusawi hi an ring zawk niin a lang!!

Nitina lo enkawltu zirtirtute kan tan a va ngai em ve le! Classroom-ah tha deuh, hnehsawh deuhin zirtirna kan pe a, kan zirlai(Student) ten kan subject an thiam viau hi a lo tawk hauh lo. Pawn lamah zu ruiin emaw, lehkha kan deng lai emaw, thil thalo engemaw kan ti lai ka naupangten min hmuh khan an rilru ah engnge kan tuh ang? Kha a zirlai tha deuha a passed ringawt kha a hmalam hun atan a lo tawk hauh lo, a nungchang a hloh si chuan tunge mawhphur ang? A nungchang a hloh si chuan a nih theihna tur, a nih phakna tur a ni phak lo maithei. Tu mawhphurhna nge? Nu leh pa leh Kohhran chuan mawhphurhna chin chu an nei ngei ang, mahse nitina lo enkawltu mawhphurhna hi a sang ber awm e, ngaihtuah ngun a va ngai em!

School pakhata Zirtirtu chuan Pathian awm ringlotu a nih thu leh Kristianna leh Bible hial pawh engmahlo a nih thu inthlahrung miah lovin a sawi an ti! He Zirtirtu hi Kohhran enkawl Sikul-a thawk a ni nghe nghe awm e. A zirlaiten engtinnge an ngaih ang aw? A then chu naupan tet ata zirtirna tha taka pek an ni maithei, mahse a then chu zirtirna mumal pek an ni lo maithei. He zirtirtu thusawi an dawnsawn dan hi a inchen lo viau maithei a ni.

Kan Zirtir te bula kan tawng duh dan te, kan fiamthu duhdan te hi belhchiandawl a nih a va ngai em! Naupangte entawn leh nunkawng hruaitu Zirtirtute hian kum 2014 September Ni 5, Zirtirtute Ni kan hman atang hian kan ram leh kan khawtlang tan bul tan thain theihtawp i’n chhuah thar teh ang u.//

Thuziak : Zirtirtute leh Khawtlang Nun

- H.Vanlalhruaia

Headmaster, Gov’t P/S-I, Bairabi

A hmasain chhiartute leh zirtirtute, Teachers’ Union-a ka member pui zawng zawng te chibai ka buk a che u.

Kan thupui hi sawi thiam a har viau mai dawn a, sawi thiam zawkte cho chhuahnan pawh a tha awm e.

Kan pipu te hun laia khawtlang nun kha upa deuh te chuan an hre chiang viau anga, a hahdam thlak zia leh a ralmuan thlak zia kha aw.! Tunlai hun nen chuan a inang lo hle ta mai. Zirtirtute hian kan khawtlang han thlir ta theuh ila, lungawithlak kan ti em? tih hi zawhna lian tak a lo awm ta.

Engpawhnise, YMA, MHIP, MUP etc. atangte hi chuan beiseina sang tak neih a harsa, zirtirtute khawtlang tana hun remchanga kan va inpe ve ngawt hi chuan kawngro a su tam lo hle mai thei. Mahse, a pawi love. Khawtlang Nun that leh that loh ah hian Zirtirtute hian mawhphurhna thui tak leh thuk tak chu kan va nei ngei ang. Khawtlang Nun a that hian a ralmuang a, a nuam thin. Zirtirtute hian kan nitin hnaah khawtlang nun leh ram kan siam a ni tih hre rengin taima tak leh rinawm taka thawk chunga kan kal a pawimawh hle mai.

Ka ngaihtuah thin a, mahni sikul naupang chhuakte nunkawng thalo an zawh hmuh changte hian rilru a na duh hle mai a, tlin lohna a lo lang fo thin.

Ramin hma a sawn zel a, heng hmasawnna dai tleu lo tur hian zirtirtuten zirlaite uluk taka zirtir leh kaihhruai an tul tak zet a, kan mawhphurhna ah i dah ngam phawt teh ang. Heng Mobile Phone, Internet, facebook leh thildangte hian kan ram leh khawtlang nun a tibuai hle mai, a tangkaina zawnah chuan a va tha em!! Thil hi a hmang thiam lo tan chuan chhiatna thlentu a ni zel mai (Ngaihtuah zui mah teh le..) Kan zirlaite nun pawh a run nasa hle awm e, zirtirtute kutchhuak chu khawtlang nunah a lo lang thin si a.

Kan rama zu leh ruihhlo lo hluar zel te hi tuman “Ti rawh u” kan tih hauh si loh, mahse kan zirlaiten an lo tih zel si chuan tan lak a va ngaiin Pathian thu nen hmangaihnaa zirlaite tihtakzeta kaihhruai a tul ta.

Pawngsual leh mipat hmeichhiatna hman khawlohna te hi inzirtirna tha zirtirtuten zirlaite ah pek tam a, fimkhur tura kan inzirtir tam a va tul ta em! Khawvel thiamna leh finna nei turin zirlaite kan duh a, mahse nunkawng an hloh si chuan hmasawnna khingbai a ni dawn a ni. Khawchhak leh khawthlang film chi hrang hrangin min run mek zel a, naupang kum 10 mi lekin, “Min hau min hau suh u, keima thu thuin ka awm ve dawn” a ti vin ve tak mai a, a nuten an lo hau ni ngei tur a ni. Hei hian khawchhak film a lo en fo mai a lo ni tih a rin theih, khawchhak leh khawthlang film kan en nasa lutuk te hian thil tha a hring chhuak angem aw?

Khawtlang Nun siam kawngah zirtirtute chauhin mawh an phur lovang. Tute nge mawhphurtu dang la awm? I ngaihtuaah tlang teh ang u. Krista aia palai hna thawh te, thawhhona tha neih te, faina te, incheina te, ram leh hnam humhalh te, ramngaw leh nungcha humhalh inzirtir te, rinawmna leh taihmak inzirtir te i uar deuh deuh ang u.

‘Rinawm leh fel taka awmin, Nitin a rawng i bawl tlat ang’ tih hla ring taka sak fo te pawh hi a tha tho, mahse kan nunpuina hmun tur lam ngaihtuah chunga kal a pawimawh ta hle mai.

A tawp berah chuan zirtirtute hi kan ram leh khawtlang nun siamthatna kawngah mawhphurhna thui tak neitu kan nih hre rengin kan thawhna hmun theuhah Pathian tihna nen i thawk zel ang u. //

Chakma Census nei dawn

Chakma Census nei dawn (thawhlawm khawn dawn)

C.YMA hmalak mekna Chakma Census neih chungchang leh hemi atana YMA Member pakhata Rs 5/- zel khawn tura ngenna leh hriattirna hmuh chu Branch OB & Section Leader Meeting thuchhuak angin Chhimveng YMA Branch huamchhungah kalpui a ni dawn a.

Thawhlawm hi Section pahnih hruaituten section huamchhungah khawn nise, September ni 15 ralhmain Branch YMA Secretary hnenah chhun tur a ni ang.

Branch hnatlang nei

Branch hnatlang nei
Dt 29th August 2014, Zirtawpni khan Chhimveng YMA chuan Library Building sak mek hmanrua tur thinglak hnatlang an nei. Hmanrua tur thing petu Pu Zobiakvela chungah Br. YMA chuan lawmthu an sawi a ni.

MPC thalaiten Zophai-ah thlam sak tum

MPC thalaiten Zophai-ah thlam sak tum

August 21, 2014-a Bairabi Zophaia Pu Lalrinchhana leilet thlam Assam Police leh Assam Forest Deptt. a thawkten an thiahsak chu tungding/sakthat leh tumin Dt 4 September 2014, Ningani zan dar 7 khan MPC Thalai Gen. Hqrs te chu Aizawl atanga Sumo 2 leh 207 pakhat hmanga thlam sakna  tur bungrua phurin Bairabi an lo thleng.

Chanchinbu buatsaih lai hian hmalakna engtinnge a kal zel dawn hriat a ni lova. MPC Thalaiten thlam sak an tum avang hian Dt 4-9-2014, Ningani vek khan Kolasib Magistrate chuan order tichhuakin MPC Thalai thlam sak tumtute dang tur leh a hmuna duty turin sipai a rawn tir a. Ningani tlai dar 4 pm vel khan IR Bn. engemawzatin Bairabi an rawn thleng tawh a ni. Politics kaihhnawih thil nia a lan vang nge ni Bairabi khua atangin a khawtlang ang leh a pawl ang zawnga MPC Thalaite hi lo tawiawm tumtu an awm lo nia thu dawn a ni.

Bairabi MZP te fehchhuak

Zirtirtu indaih loh chungchangah Bairabi MZP te fehchhuak

Dt 2.9.2014, Thawhlehni khan Mizo Zirlai Pawl, Bairabi Sub-Headquarters hruaitu te chuan Bairabi khuaa sorkar sikul hrang hranga zirtirtu indaih loh chungchangah Kolasib District Education Officer te dawrin an kal. Department hotu ten an lo dawngsawng thain, zirtirtu indaih lohna avanga zirtirtu dahbelhna tur kawngah theihtawp chhuaha hma lakpui an tum thu MZP hruaitute hi an lo hrilh a ni.

MZP, Bairabi Sub-Hqrs Survey record-a a lan danin tun dinhmunah hian Bairabi-ah Gov’t Primary School 5 a awm mek a. Primary School tinah hian Zirtirtu pahnih (2) theuh awmin zirlai 30-50 vel zel nei vek ang an ni a, zirtirtu indaih loh avang hian harsatna an tawk nasa hle nia thu dawn a ni.

Hetih lai mek hian Gov’t P/S-I Teacher Pi Sanghlupuii chuan Headmaster (Headmistress) promotion hmuin Gov’t P/S-V ah a awm dawn nia hriat a ni a. Gov’t P/S-I ah hian Zirtirtu dah belh a nih loh chuan Zirtirtu pakhat chauh a awm dawn tihna a ni.

e-Disctrict run thei tep

Bairabi atangin Internet hmangin office dawr theih dawn

(e-Disctrict run thei tep)

Sorkar laipui hmalakna in Mizoram khawtinah mipuiten a hmuna kal kher lova sorkar pisa an dawr theihna tur ruahmanna chu chak taka kalpui mek a ni a, he hmalakna hi Bairabi khua pawhin kan chhawr ve thei tep ta.

Dt 27.8.2014 khan Kolasib DC Conference Hall-ah CSC & RIK VLE ten workshop neih a ni a. Hun reilote atangin Kolasib District-ah e-district kalpui theih tur a nih thu leh VLE ten mipui hnena service an pek chhuah theih tur inzirtirna hun hman a ni.

He hmalakna ah hian service-31 pekchhuah theih tura hmalak mek a ni a, tun dinhmunah erawh pilot project anga kalpui tur a nih avangin service-3 chauh pek theih a ni hrih dawn nia sawi a ni.

Bairabi khua atangin VLE kaltlangin Kolasib DC Office-a kal kher tawh lovin Income Certificate, Residential Certificate leh Caste (Tribal) Certificate te lak theih a ni ve dawn ta. A hnu zelah chuan mipuite mamawh service dang dang pawh pekchhuah theih a ni dawn nia thu dawn a ni.

Tun dinhmun ah Kolasib District-ah hian VLE-23 an awm mek a, Bairabi-ah hian RIK leh CSC VLE pakhat ve ve awmin an hnen atang hian service pekchhuah a ni dawn a ni.

Blood Donation Camp nei

Group YMA Blood Donation Camp nei

Dt 27th August 2014, Nilaini Dar khan Zampuimanga Group YMA Conference thurel bawhzuiin Group huapa Blood Donation Camp neih a ni.

He Blood Donation Camp ah hian Kolasib Blood Bank atanga thawktute lokalin Bairabi North Branch YMA Library Building-ah Blood Donation Camp hi neih a ni a, Zampuimanga Group huamchhunga Branch hrang hrang te kalkhawmin Thisen Unit 53 (Mipa 38 leh Hmeichhia 15) pek a ni.

Blood Donation Camp-a tlawmngaih chhuaha midang tana thisen petu YMA member zawng zawng te leh hneh taka thlengtu Bairabi North Branch YMA te chungah Gr. YMA hruaitute chuan lawmthu an sawi tak meuh meuh a ni.