Thuziak mi ka ni lova, thuril leh tawngkam thluaithlum phei chu ‘ka haa’. Tawngkam thiam sawi tur pawh ni lo mah ila, ka rilru ngaihtuahna leh ka vei zawngte sawia ka ziah ve theihnana he chanchinbu lo piang kher kher hi chu(h)... lawma zuan tur ni ta se a zuang sang ber pawl ka ni hial ang chu.
Tun tumah pawh hian ka lo vei em em, kumpui lingleta ka lo tuar ve fan fan ka rawn puahchhuahpui lehpek dawn a nih hi. Upa in, “Tuisik ui a thiang lo” an lo ti mathlawn lovin, tute emaw tana ‘tuisik ang’ a lo nih tak mial in..!
‘Ber thla kan kai leh ta vu mai! Ni chhuak leh tla a mawi tanin lunglai a pawl leh ruih ta mai! Loneituten an thawhrim rah an seng hun a lo hnai ta a, khua pawh a lum sa hulh hulh a lo reh tial tial anga, favang awllen hun kan thleng chho anga, thlasik kawng pawh a rawn inlar leh ang. Nileng lenga ‘fan’ hnuaia thu thin khan Blanket kan chuh leh ngei ang le.. Tichuan, Krismas a lo thleng ngei anga, he khawvel ram zau ah hian lungngaia indawm kun tur kan va tam leh dawn em!!?
A then an hmangaih kalta te ngaiin an rum vawng vawng anga, thenkhat te lah engmah tihsak theih an neih loh avangin mittui nen fate an thlir anga. Thenkhat chu ‘Masi’ ruaithehnaa kal ve chak, dam lohna avang te, rualbanlohna avanga mi zinga tuitla lo riaua inhriatna avanga inthlahrung te, fahrah chanhai riangvai, ngaihsaktu leh hmangaihtu nei lova in hria te nen!! Thenkhat lah chhandamtu Lal Isua pianchamphaphak tih reng dawn lovin nawmsipbawlna hun atan te, ruihhlo tih tanna ni ah te, humsual daina hun remchang ah te an hmang ngei awm si a.. Kan nghahfak Krismas chu kan dam anga, thlasik anga khel lovin a lo thleng leh ngei dawn. Mahni invurna atan leh nawmchenna atan chauh em ni kan hman liam leh dawn le?
Naupang pakhat chuan a nu hnenah, “A nu, Masi putar hi engatinge mi hausa te leh ka thian te bulah chauh a kal bik ziah a? Keini ang engmah lei theilo te hi min pek zawk awm tak a nia, a ti mak ngawt mai” tiin a nu hnenah a vui ve a. A nu chuan, “Bawihte, i Masi putar chu engtikah emaw a lo la thleng ve mai dawn alawm” tiin kumtin a hnem thin an ti. Khawngaihthlakin...
24th December zan apiangin Aizawl Temple kawtah Salvation Army ten ‘Coffee Nite’ an buatsaih ziah thin a. Pawisa tlingkhawm te mi harsa, fahrah te leh tanpui ngai te tanpuinan an hmang thin. Tin, veng thenkhatah Kohhran Thalai leh YMA member-ten vengchhungah vehbur khawn mai lovin hetiang ang deuh zawnga tanpuina buatsaih kan hre nual bawk anga, hei hi ka thik a ni.Kan hunpui, Lal Isua kan tana a lo pianna ni ah hian kan ringtu nihna te, kan hnam; tanpui ngaite tanpui a, chhawmdawl thin rilru pu Mizo hnam kan nihna te parvul leh zual se a va’n duhawm em!! Mosolman, ringlotu kan tihte hian an Kût ropui ber niah Bawng talh ve thei lo, sa nei ve zo lo te sa an sem kual ve thin a, chhang nei zo lo te an kep thin a sin! ringlotu mah mah. Kan neih zawng zawng nena kan pen rik chhawng chhawng lai hian, kawngkhar phenah nangmah ang nih chak ve a zak kimki chung chunga lo thlir ru rengtu che an lo awm mial mai thei a sin. Intithei suh, chapopui nana hman chi pawh a ni lo, kan neih chhun atanga a nei ve lo te kan hleh then ve hian van mite an lawm a sin. An tan vantirhkoh kan ni thei a, kan tan Lal Isua kan ina thleng ang mai an ni thei asin.
Kan Pathian thu chuan, ‘Mirethei khawngaihtu chuan Lalpa a puk tir a ni’ a ti a. ‘Lak aiin pekin lukhawng a nei’ a la ti fan a, kum 2014 Krismas lo thleng tur hi midangte tana malsawmna ni turin rilru thar i pu teh ang u. ‘Tuman tanpuina an pe ngai lo’ ka ti lova, NGO te, Kohhran Thalai te, chhungkuaa tanpuina pe thin pawh ka hria, kan hre theuh. Amaherawhchu, kan Lal Isua piancham lo thleng turah hian kan zavaia tanrual a, thangthar leh naupang, nu leh pa te, a bo a bang awm lova mite tana malsawmna nih dan a awmin ka hria.
Kan khua hi hmuhtheiha khaw changkang sawt tak kan ni a. Tin, ennawm en paha thianghlim taka mite tana malsawmna ni turin ‘Coffe Nite’ emaw concert emaw, variety show etc. te hi awm ve thei ta se a ropuiin a phurawm phian lawng maw? Khaw tangrual leh mahni khua leh a mi cheng te kan inhmangaihna leh ngaihsakna lanna tur diktak niin ka hre ve tlat. Lungngaih hapta, ‘Krismas a lo thleng leh ngei dawn si a.//
No comments:
Post a Comment