HRISELNA HUANG

- H.D. Lalduhawma P.H.C.

Naupai :- Nu naupai tur emaw naupai mek ten harsatna kan la tawk fo mai hi kan in ngaihthah vang niin a lang. Naupai mek emaw la pai turte chuan kan thi neih tawp emaw, naupai anga inhriatna kan neih chuan a ni leh thla hriat a, Sub-Centre ah in report ngei ngei tur a ni.

Laiking fa neih ang maia fa hi pai tur a ni lova, pum chhunga fanau rochan hlu tak Pathianin min pek te hi kan duat a, a pai tu pawh kan induat tel a ngai a ni. A paitu a inenkawl thata a hrisel chuan a nau pai pawh a hriselin a chak a, fa neih hunah pawh harsatna tam tak lakah an him thin a ni.

Mi tam tak fa pai chungchangah in ngaihthah leh in report tha duh lo kan la awm zeuh zeuh hi a pawi hle a ni. Fa neih chungchanga harsatna tawk la awm zeuh zeuh te hian Sub-Centre a in report lo leh Doctor emaw Nurse emaw rawn lo an ni tlangpui. Chuvangin, mahni inthlahdah avang hian, raicheh, hlamzuih, naupian dik lo leh nu leh naute nunna thlenga chan theihna a thleng thei a ni tih hre thar lehin, naupai tantirh atangin Sub-Centre ah in report a, an thurawn kan lakthiam/pawm a, Doctor emaw Nurse emaw te kan rawn fo hian heng harsatna kan tawh thin te hi kan pumpelh ngei ringin inthlahdah lovin i inngaipawimawh hram hram ang u. Luhlulna kalsana inthlahdah lova thuawihna hian rah duhawm tak a chhuah ngei beiseiin, thurawn lakna tur diktak hnenah chauh kalin rawn ang che.

“Inenkawl(tihdam) aiin inven atha zawk.”

Mihring kan nih chhung chuan fa neih hi a tawp dawn si lo. Tu fa nge i pai? Tu fa pawh chu nise inhmangaih la, i pum chhung ami naute pawh hmangaih rawh, nang leh naute tana nung i ni si a.//

ENGTIN NGE KAN TIH TAK ANG LE..? - Mampuia Nu Chawngthu

Tui let hnuah a vawikhatna atan kan khua chuan Y.M.A. General Conference nakkum ah kan thleng dawn ta rup mai. A va lawmawmin ava huphurhawm si em!! Kan khaw tana thil tha tak ni tura ka lo beisei ber chu, ‘Kawng tha kan nei anga, khawchhuang ah Development a tam anga, etc..’ tih lam a ni ber lo. Kan nunphung kan thlakthleng theih phahna turin a ni ka lo beisei ber ni !!

Y.M.A. Gen. Conference kan thleng dawn a ni tih ka hriat rual ruala ka rilru a thil lo lang hmasa ber chu, “Insiamthat kan va ngai nasa dawn em,” tih hi a ni. Kawng engkimah tun aia nasa zawka kan lo inbuatsaih hi a tulin ka hria a, ka sawi pawp pawp dawn a, “Chawngkhumdan tlang huat loh” kan ti a ni ang chu.

1. KAN NUNPHUNG HI :
Kan nun dan, kan khawsak phung, kan tawngkam thleng hian ‘change’ (mi tawng ka hawh ve chhin) / thlakthleng kan mamawh. Hetiang renga kan tal huat huat reng anih chuan kan dawl zo lovang. Ei leh in, riahna tur leh tui in tur lam ah chuan lo dawl zo ta tehreng pawh ni ila, kan khawtlang nun hian a dawl lovang tih ka lo hlau lawk (khanglanga pawh ilo ti mai thei e). Tun dinhmunah hian mahni pawh engmah nilo, midang pawh engahmah ngai chuanglo kan la tam. Thenawmpa engahmah kan ngai lova, thenawmnu in min ngaisang bik lem hlei law.. Miin thil tha a tiha fak a hlawh lawm lawm lai pawha sawiselna tur lo inzawn phet te, mi ngaihsan leh mi fak ngawih ngawih ‘mahse’ tihna tur zawnga hnim kuala, a uihna lai zawng talh kan sawi ang maia lo inti fing talh kan awm te hi sim ang u.

Kan infiamna tawngkamte lah hi a pawhlah leh lutuk a, naupang ngaihthlak ve tlak pawh ni manglo hian thingpui dawr leh khawilai emaw hmunah zahmawh rawngkai leh rawngkailo chawhpawlhin kan nui khek uar uar a, a mawilo. Infiam tur, mahse infiamna tawngkam chu engang paw’n na rawh se, a bula mi tan ngaihthlak hrehawm khawpa infiam uar hi a awm ve ania. Kei ngei pawh hi fiamthu duh, mi aia uar chi ka nia, sim tur ka va’n ngah em!! Kan nunphung hrim hrim hi a zalen a, a nuam. Amaherawh chu zalenna a awm rualin inthlahdahna alo piang a, kan inven nasat a ngai niin ka hria, ‘An khua chu a nuam, a khawthleng a rem, tui a tam, mahse...’ min tih zui vaih zawngin maw... Aih ka laih saih ani mai..!!

2. THAWHHONA THA / LUNGRUALNA :
A va pawimawh tak em!! Hmanah pawh ka sawi tawh. Miin engtinnge thahnem ngai taka mutmu pawh tuah tha hman lova khawtlang tan a thawh pawh inhriatsak nek lova insawisel bawih bawih kan ching hi i sim ang u. Miin inti hre taka a thil hriat chhun a sawi bawrh bawrh hian a aia hria chu alo ngawi reng tih chu a hre miah lo zu nia!! “Chutin khatin tih mai tur a lawm” ti thin te hian rawn ti ve tak tak se an va rem hre dawn em!! Inkhelte aia khel velo tute au rinzia kan sawi tawh kha. Mi sawiselna pawh ngaithla hman lova khawtlang tana bei ngar ngar tute avang a ni lawm ni hetiang hi kan la nih le!! “Y.M.A pawh ka ni ve lo a niang, hnatlang pawh ka hre lo, inti Y M A ho khan ti mai rawh se” kan ti reng dawn em ni? Gen. Conference kan thleng dawn a nih hi!! Kan intih luhlul luiha, kan khawtlang hruaitute kan tawiawm peihlo anih vaih chuan aw... Awi ka rei Lucknow.. zahthlak dawn rem rem!!

3. KAN BAWLHHLAWH HI :
Mahni tawkah changkang thei ang berin inchhung kan chei a, furniture nise tunlai thei ang berin, lirthei nise heti zat hi a tlan ve zut zut reng tawh mai a, mahse maw... kan bawlhhlawh te hi... tukverh lam han hawithla ila kawmthlang lam ah alo par tuar zel mai nia, hal fai hleih lovin!! Phaizawla awm kan ni a, kham sang leh luikawr vela bawlhhlawh paihna tur kan nei ve silo, arem rem ah kan bun kuala, kawmthlang luikawrah a inbang uai hnep hnup bawk a, kawngsira kan han hal ve te lah hi kangbang neng nung ten kan kalsan a, kawngsir velah sarang a tle tlep phei tuarh bawk a, kal paha thil ei ten an ei zawhna hmun hmunah a bawm ruak an thlawh vir nghal char char tihna!

School naupang te emaw, puitling pawh nise thil eina kawr te bawlhhlawh bawma paih nghal zel hi inzirtir thar ila, a bawm a khah pawn fai taka halral nghal inzirtir bawk ila, chuti a nih loh chuan maw, “Hnung lam atang chuan achha, hma lam atang chuan are” min ti dawn!!

Sawi tur a tam, kan sawi seng awm love, midang thahnemngai te’n chhunzawm ve tawh sela. Tun atanga uar taka inzirtirna emaw inbuatsaihna te hi kan tih loh chuan nakinah mualpho a hlauhawm. “Hemi lam kawngah hian kan la kal ngai si lo” tih ziak a nih kha.//

LAWRKHAWM

Bialtu MLA lokal
Kolasib Bialtu Minister Pu PC Zoramsangliana chu hun rei tak bawrhsawmna in a tlakbuak hnuah hriselna tha tak nen a bial fangin a rawn kal leh thei ta.
Bialtu MLA hian a nupui Pi Lalthlamuani, President MHIP Gen. Hqrs Dt 23.10.2014-a Bairabi Chhimveng MHIP Silver Jubilee-a Chief Guest chu a tawiawm a. Chawhnu dar 1 ah Chairman a nihna angin 70th YMA Gen. Conference Organising Committee meeting a hovin neih a ni bawk a, 24.10.2014-ah mipui tan  interview hun a hawng bawk.
Bialtu MLA lokal hi District Congress Block hruaitute bakah MJA lam ten an rawn tawiawm a ni.

Group YMA Zaipawl inruat belh dawn
Zampuimanga Group YMA Executive Committee in 2015 70th YMA General Conference atana YMA zaipawl member mi 15 aia tam lo ve ve ruatbelh tura Bairabi North & South YMA Branch te a hriattirna chu Branch hruaituten ruahmanna an siam mek a, YMA member-te rilru lo inkau tura ngen kan ni e.

Kumpuan chungchangah hma la thar dawn
October ni 21 zana Bairabi Chhimveng YMA Branch Committee chuan YMA Kumpuan hmalakna hrang hrangah chak taka hma lak nise tiin an rel. He hmalakna hian ruihhlo khuahkhirh kawngah te, hnamdang dan lova Mizoram chhunga awm dapchhuah beihpui te leh Bairabi Joint YMA hmalak mekna luidung khuahkhirh humhalh kawngah te a ni ang.

Vocational cum Skill Development training Programme
Dt 20th October 2014 chawhnu Dar 1:00pm khan Diakkawn YMA Committee Room-ah Pu T. Sangkunga MLA, Chairman Mizoram Youth Commision chuan Vocational cum Skill Development Training Programme a hawng.
Ruahmanna hmasa a 31st October 2014 thleng awh tura tih a anih laiin MYC Chairman lo thlen hnuin a hun pawh sei a ni a, 7th November 2014 thleng a awh dawn a ni. Kolasib Sub-Hqtr atangin mi 140 in he training nei tur hian registrtion an ti a, Zampuimanga Group huamchhung atangin mi 20 tel an ni.

Plastic Chair dah thar tawh
Bairabi V/C in Zampuimanga Hall-a dah tur Plastic chair 200 Nos an lei chu Zampuimanga Hall enkawlna hna Br. YMA kuta dah anih tawh avangin Dt. 22.10.2014 (Nilaini) zingkar khan lak phei a ni a, a awmna tur hmun Zampuimanga Hall-ah dah a ni ta. Zampuimanga Hall enkawlna hna hi Bairabi Chhimveng Branch YMA kuta a awm tak avangin Hall hmang duh leh tul dang thilah chuan Branch YMA hruaitute biakrawn tur a ni ang.
Tin, Zampuimanga Hall-a bungraw hrang hrang, Chair etc. te hi dim lo taka hman a remchang dawn lova, dimdawi taka enkawl theuh turin mitinte ngen kan ni.

Tanpuina Lehkhabu dawng leh dawn
Mizoram State Librarian atanga hriattirna kan dawn angin 2013-2014 Raja Ram Mohan Roy Library Foundation Matching Scheme atangin tanpuina lehkhabu Chhimveng Branch YMA te chuan an dawng leh dawn ta. Heng tanpuina lehkhabute hi December ni 19 2014 hmain lam tur a ni.

RTV-TRP an tang chho telh telh
Tunlai hian Ramthar Veng Tangrual Pawl te chuan nasa takin tan an la chho mek zel a, kawng hrang hranga an vengin hma an sawn theihna turin hma an lak thu dawn a ni. Ruihhlo chungchangah strict taka khuahkhirhna kalpui a nih zel dawn thu leh vengchhung tangrual pawlten dan an zam bawhchhe lo turin mitinte an ngen a ni. Kartir lamah khan ruihhlo an man neitu thenkhat chu anmahni duhthlanna in Chhandamna Camping-ah an lo tir lut tawh a ni.

Vanapa Section YMA hnatlang, hma an la chho zel dawn

Vanapa Section, Bairabi North Branch YMA chuan YMA Gen. Conf.  Bairabi-in kan dawn tur inbuatsaihna atan Section huamchhung thianghlimna kawngah hma an la chho mek. Dt 23.10.2014, Ningani khan nilengin hnatlang an nei a, member 30 chuang zet an thawkchhuak a, a tul angin hnatlang hi neih chhoh zel an tum. YMA Information Mike atang leh a remchang anga mimal inah te kalin thianghlimna kawngah inzirtirna hun an hmang chho mek bawk a ni.

70th YMA General Conference 2015 Organising Committee nei ta

YMA Gen. Conference 2015, Zampuimanga Group YMA, Bairabi-a thlen tur chungchangah Dt 23.10.2014, Ningani chawhnu dar 1:30 khan Organising Committee hmasa ber chu Chairman Pu P.C Zoram Sangliana, Bialtu MLA hovin neih a ni.

Chairman, Pu P.C. Zoram Sangliana MLA chuan kum 2015 YMA General Conference Bairabi in a thleng tur chu lawmawm a tih thu a sawi a, kum 2015 Conference chu Central YMA hruaitu thlan kum anih avangin palai kal pawh an tam a rin thu leh theihtawp chhuaha tan lak a ngaih thu a sawi a, a bik takin Bairabi khawtlang mipui te inlungrualna leh tanrualna a pawimawh thu a sawi a ni.

He committee-ah hian Conference chungchanga inbuatsaih dan tur kawng hrang hrang sawiho a ni a, Sub-Committee peng hrang 15 siam a ni a, hetiangin :
1. Pandal 2. Refreshment
3. Reception 4. Souvenir
5. Light & Sound 6. Decoration
7. Ushering 8. Health & Medical
9. Information & Publicity 10. Food & Supply
11. Water & Sanitation 12. Traffic & Security
Organising Committee member mi 9 ruat belh a ni bawk.
2015 YMA Gen. Conference Organising Committee chuan hetiangin committee member a ruat belh :
1. Pu Lalchanhlua, President, Kolasib
Block Congress Committee
2. Pu H.Vanlaltluanga, President
VC, Meidum
3. Pu Andrew V.L Auva, Kolasib
4. Pu Lalfakzuala, BDO Bilkhawthlir
5. Pu Lalsawmliana Hauhnar,
SDO PHE, Kolasib
6. Pu R.Romawia, EE P&E Kolasib
7. Bairabi khawchhuak Welfare
Association, President & Secretary
8. Bairabi khawchhunga Kohhran
hrang hrang aiawh mi pakhat theuh.

Kum 2015 YMA Gen. Conference atana hruaituten cheng nuai 45 ruahman chhinna an siam chu sawihovin pawm a ni a, cheng nuai 45 atang hian Sub-Committee hrang hrang te hian an sum mamawh zat tur sum ruahmanna siamin kum 2015-a Organising Committee neih leh hun hmasa berah chhawpchhuah a ni ang. Sub-Committee hrang hrang Office Bearer tur leh Committee member turte chu Working Chairman kaihhruainain Organising Committee in an ruat dawn a ni.

Date 22nd January 2015 ah Organising Committee Chairman, Bialtu MLA Pu PC Zoram Sangliana hovin Organising Committee neih leh tura ruahman a ni.

Bairabi South MHIP ten BRANCH SILVER JUBILEE LAWM

Dt 23.10.2014, Ningani khan Bairabi Chhimveng MHIP te chuan Branch kum 25 Champhaphak (Silver Jubilee) an lawm.

Silver Jubilee lawmna hun hi chawhma dar 11:00 atangin Zampuimanga Hall-ah hun hman a ni a. Chief Guest Pi Lalthlamuani, President MHIP Gen. Hqrs, Kolasib Sub-Hqrs. MHIP hruaitute leh Bialtu MLA Pu PC Zoramsangliana leh sawm bik te hnen atangin fuihna thuchah ngaihthlak a ni a, tlai lamah Silver Jubilee lawmna ruai theh a ni.

Bairabi Branch MHIP ni thin chu kum 1989 atangin Bairabi North & South Branch din a ni a,  kum 2014 thleng hian Bairabi South Branch MHIP ah hian hruaitu (Office Bearers) mi 19 an lo awm tawh a ni.

Editorial - 18-11-2014

Thuziaktu thenkhat leh chhut miten, ‘Mizote hi ze nghet nei lo kan ni, engemaw hi kan bawh huk a, a hniak tam lam lam ti ang mai kan ni’ an lo ti a, engemawchenah chuan a dik awm e.

Mahniin ngaihtuah thiamna (Idea) kan neih miau loh chuan mite tih kan entawn mai loh nakah. Mahse, mite kan entawnna kawng hi a tha lam ni thei zel se a va duhawm em! A chhe zawnga sawi duh tan chuan a tha lo lama midang kan entawnna hi sawi tur ting chuan a awm ve tlat si a.

Engpawhnise, zau tak kan huam thei lovanga, kan mamawh leh kan zawh tawk ang zela ngaihtuahna kan sen a, kan hmuh phaka thil tha tihtur awm hi ka ti ve thei a ni tih rilru pu chunga hma kan lak a pawimawh.

Engemaw tak a thleng riau a nih loh chuan BAIRABI ah YMA Gen. Conference kan thleng ngei dawn. Chhungkaw thenkhat chuan kawng hrang hrangin tun atanga ngaihtuahna sengin an inbuatsaih tan der, a va lawmawm em! Midangte pawhin hetiang hi entawn na chang i hria ang u. Tel ve lo leh bang tur bik anga kan lo inngaih ngawt hi a fu lo maithei.

Tin, veng thenkhatte leh pawl thenkhatten Khua/Veng tana tha tura an rin angin hma an la chho mek zel bawk a, an tanrual that phawt chuan an tum ang hi an ti thei turah ngai ila. Hetiang te hi Pawl dang leh veng dang te hian inzirnan leh thil tha tih ve phahnana kan hman a va tha em!

ZAMPUIMANGA GROUP Y.M.A EXECUTIVE COMMITTEE THUREL

Dt. 15.10.2014, Ningani khan Zampuimanga Group YMA Executive Committee neih a ni a, thurel tlangpui te :

Thurel 1 Na : Organising Committee din chungchang :-
70th Y.M.A General Conference 2015 Organising Committee hetiang hian din a ni.
Chairman : Pu P.C. Zoramsangliana, Bialtu MLA.
Working Chairman : Pu H.Vanlalbika, President Group Y.M.A
Sr.Vice Chairman : Pu J.Lalchhuanawma Adviser Group Y.M.A
Vice Chairman : Pu CT.Mawia, President, Sub-Hqrs Y.M.A.
Secretary : Pu Vanlalfela, Secretary, Group Y.M.A
Asst. Secretary : Pu C.Lalbiakenga, GEC.
Treasurer : Pu H.Lalzawmliana, Asst.Secy. Gr.Y.M.A
Fin.Secretary : Pu Laldinpuia Ralte, GEC
Patron : 1) Pu Lalthanzara, Minister H& FW, etc.
: 2) Pu Lalrinthanga, Parliamentary Secretary.
: 3) Pu Lalbiakzuala, President C.Y.M.A.
Committee Members te :-
1) Pu.K.Lallianpuia, Vice President Group Y.M.A
2) Pu.Vanlalnghaka, Fin. Secretary Group Y.M.A.
3) Tv.K.Lalawmpuia, Treasurer Group Y.M.A.
4) Pu.C.Lalchhandama, Vice President, Bairabi ‘N’ Br. Y.M.A
5) Pu.K.Lalrinchhana, Secretary, Bairabi ‘N’ Br. Y.M.A
6) Pu.F.Lalduhawma, President, Bairabi ‘S’ Br. Y.M.A
7) Pu.B.Lalnunkima Secretary, Bairabi ‘S’ Br. Y.M.A
8) Pu.Lalchhuanmawia, President, Bukvannei Br Y.M.A
9) Tv.Lalhriatpuia, Secretary, Pangbalkawn Br Y.M.A
10) Pu.Lalthangmawia, Vice President, Meidum Br Y.M.A
11) Pu.R.Lalrinawma, Vice President, Joint Y.M.A Bairabi
12) Pu.Lalrinmawia Ngente, Secretary, Sub-Hqrs. Y.M.A Kolasib
13) Pu.H.Lalhmangaiha, Vice President, V/C Bairabi
14) Pu.C.J.Lianchungnunga, Member, V/C Bairabi
15) Sub-Deputy Commisioner, Bairabi
16) President & Secretary, Joint Y.M.A Bairabi
17) President & Secretary, M.Z.P Sub-Headquarter, Bairabi
18) President & Secretary, MHIP Bairabi N & S Branch.
19) President & Secretary, MUP Bairabi N & S & Rail Station.
20) Pu.P.C.Lianzuala, Range Officer, Bairabi Range.
21) Pu.Lalrinawma, Sub-Divisional Officer, PWD Bairabi
22) Pu.Johana, Inspector, Police Station Bairabi
23) Pu.Lalramchhana, Range Officer, Saihapui ‘K’ Range.
Heng bakah hian Organising Committee in tul a tih chuan Committee member an ruat belh thei dawn a ni.
Chairman P.C.Zoramsangliana remchan hunah Organising Committee neih nise, Group Office Bearer ten lo bawhzui rawh se tih a ni.

Thurel 2 Na : Group Y.M.A Zaipawl chungchang :
Group Y.M.A Zaipawl Convener Pu.RK.Lalchhandama hnen atangin Gr. YMA  Zaipawl report ngaihthlak a ni a, a kalpui zel dan tur sawiho a ni a. Zaipawl member in ruat belh nise, Bairabi North leh South Branch Y.M.A ten Zaipawl member 15 aia tam lo rawn ruat/thlang se, Zaipawl memberte Conference kan thlen dawn avangin active leh zual turin Branch tin ten hmalak nise tih a ni.
Tin, General Conference-ah hla vawi hnih tal nei thei tura inbuatsaih nise, Zaipawl member ruat tharte chu October thla ralhmain Group Secretary hnenah hriattir nise tih a ni.

Report : 69th General Conference 2014 thlengtu (Ratu) Organising Committee-in Conference thlenna tur atana inbuatsaihnan Rs 40,000/- Zampuimanga Group Y.M.A min hlan thu Chairman Pu.H.Vanlalbika hnen atangin ngaihthlak a ni a, lawmawm kan ti a, Organising Committee kutah hlan nghal a ni.

YMA GENERAL CONFERENCE VAWI 69-NA ROREL MINUTE

A. YMA KHAWIH :
1. “YMA Dan Bu ennawn ni rawh se” tih chu uluk takin kan sawihova, a lo luh ang hian kan pawm.
2. “Kan hnam incheina/thuamhnawte hi tun aia uluk leh fimkhur zawka humhalh ni rawh se” tih chu ngun takin kan sawihova, a lo luh ang hian lungrual takin kan pawm.
3. “Chhiatrupna laka lo inven dan inzirtirna hi thingtlang lamah neih a nih ve theih nan Central YMA-in hma la rawh se” tih chu ngun taka ngaihtuah a nih hnuah, a lo luh ang hian kan pawm.
4. “Kumpuan pual thawhlawm member tinah Rs. 5.00 khawn ni rawh se” tih chu ngun takin kan ngaihtuah a, kumin atan chuan khawn rih loh tih rawtna a awm avangin ban pharin khawn leh khawn loh chungchang kan buk a, kumin atan chuan kumpuan pual thawhlawm member tina Rs. 5.00 khawn chu tih rih loh nise kan ti.

B. SORKAR KHAWIH :
1. “Mizoramah Paper Mills din a nih theih nan Sorkar-ah ngenna siam nise” tih chu uluk taka ngaihtuah a nih hnuah ban pharin kan buk a, Mizoramah Paper Mills din a nih theih nan Sorkar-ah ngenna siam nise tih chu pawm a ni.
2. “Drugs License Sorkar-in a pek dawnin License diltu awmna Group emaw, Branch emaw hriatpuina lehkha tel ngeia pek a nih theih nan hma lak ni rawh se” tih chu ngun taka ngaihtuah a nih hnuah, a thu tlema siam thain hetiang hian kan pawm. “Drugs License Sorkar-in a pek dawnin License diltu awmna Branch YMA hriatpuina lehkha tel ngei a pek a nih theih nan hma lak ni rawh se”.

III. KUMPUAM RAWTNA : Kum 2014-2015 chhungin YMA kumpuan neih tha kan ti a, ngun taka kan sawiho hnuin, YMA kumpuan atan Ram leh Hnam Humhalh tih leh Intodelh chu palai ten ban pharin kan buk hnuah “Ram leh Hnam Humhalh” tih chu kan pawm.

V. CHHIATNI THATNI KAIHHRUAINA : Chhiatni thatni kaihhruaina (2006 Revision chhut vawi 7-na) siamtha tura rawtna lo lut hrang hrangte chu, siamthat ngaite siam thain hetiang hian kan pawm.
a) SL. NO. 4-NA : ZUALKO
Siamthat rawtna :
Sub. No. (k) hi paih nise.
2) SL. NO. 6-NA : THIL KHAWN
Siamthat rawtna :
Thil khawn chungchanga pawisa zat Rs. 2/- lo lang hi telh tawh loh nise, buhfai khawn tur zat pawh hi tarlan loh mai nise. Hetiangin, “Mitthi an awmin, Branch tinin mahni veng mil ang zelin mahni veng chhungah mitthi chhungte tanpuina hi kalpui nise”
c) Sl. No. 7-na : Thlanlaih
Siamthat rawtna :
Sub. No. (h) belhin, ‘Thlan laih lawk emaw, hlawhfa laa thlan laih hi Branch te remchan dan anga kalpui nise.
d) Sl. No. 8-na : Inphum thu
Siamthat rawtna :
Zing dar 9.00 hmalama thi chu a ni la laa inphum nise, tulna bik awmah chuan YMA hruaitute leh Mitthi chhungte inbiakremna angin kal ila.
e) SL. NO. 9-NA : Mitthi Vui
Siamthat rawtna :
Sub. No. (e) hi hetiang hian thlak nise:
Thlan vur hi YMA ten tlawmngaia kan inpui thin hi a mawi a, makpa leh tu leh fa ten kan mawhphurhna a ni tih erawh hriat a tha.
Sub. No. (h) belhin, A tul angin YMA Hall/Community Hall leh remchangah invui theih nise.
f) SL. NO. 10-na : Kuang
Siamthat rawtna :
Sub. No. (d) belhin, Kuang atan thing kan hman ai hian ply board/bamboo ply hman theih nise.
g) SL. NO. 13-NA : Kuanga indah hun
Siamthat rawtna :
1. Sub. No. (b) hi hmang tawh lova paih nise.
2. Sub No (c) belhin, Kuang chhunga ruang khung hi chhungkhat lainate mawhphurhnaa ngaih a ni a, YMA hruaituten tlawmngaia tawiawm thin nise. (Sub No. ‘b’ a awm tawh lovang a, Sub No. ‘c’ hi ‘b’ ah a lut ang)
h) SL. NO. 14-NA : KHAWHAR LENPUI
Siamthat rawtna :
Khawhar lenpui chungchangah - Ruang thlak zan atanga chhiarin zan thum hi YMA zan atan hman theih nise, tih belh nise. Tin, a remchang laiah hetiang hian belh nise - Zan lamah thalaite hunah YMA ten kaihruaitu fel tak kan insiam thin hi chin zui zel nise, hun hman dan pawh YMA Branch-in tha a tih dana ruahmanna siam thin nise tiin kan pawm.
i) SL. NO. 15-NA : KHAWHAR IN RIAH
Siamthat rawtna :
1. Sub. No. (h) belhin, - Bungraw lakkhawm pek fel leh khawhar chhungte a tul anga tanpui hi khawhar in riakte mawhphurhna a ni tih hre thar ila.
2. Khawhar in riah chungchangah Branch tin ten mahni remchan danin inkaihhruaina dan siam mai thin nise.
j) SL. NO. 16-NA : INRALNA
Siamthat rawtna :
Sub. No. (d) belhin, - Ralna bawm hun pawh hi a thatna a awm thei a, YMA Branch-in tha a tihdan anga kalpui nise.
k) Sl. No. 18-na : Puana intuam :
Siamthat rawtna :
Mizo hi laina hnai leh thian thate puana intuam thin kan ni a, hei hi chin dan mawi tak a ni tiin dah nise.
l) Sl. No. 25-na : Mikhual thi
Siamthat rawtna :
(Sub. No. (d) i & ii
(i) Branch-in tul a tih loh chuan khawn tesep khawn a ni lovang, tlaivarpui leh ruang thawnchhuah chungchangah Branch-in remchang an tih angin kalpui nise.
(ii) Dan lova awmte pawh Branch-in tul a tih angin kalpui nise.
m) SL. NO. 28-NA : Damlo en
Siamthat rawtna :
A thupuia Damlo en tih leh Sub. No. (b)-a Damlo en tih aiah damlo kan tia thlak nise.
n) SL. NO. 29-NA :
Siamthat rawtna :
Ruang phurtu leh zuitu motor-ah Flag dum zar thin nise.
o) Sl. No. 22-na : Hlamzuih
Hlamzuih chungchanga rawtna lo lute chu ngun takin kan sawihova, YMA General Conference 1982 thurel 12-na ang hian a ngaia kal nise tiin lungrual takin kan pawm, hetiangin - YMA General Conference chuan hetiang hian hlamzui chungchang a rel a; “Mi, thla thum (ni 90) hnuai lam a thih chuan hlamzuiha thi a ni ang. Mitthi kan insawngbawl dan leh intawiawm danah YMA te’n mitthi pangngai anga buaipui (khawntesep, inriahpui, zualko etc) tur china kan ngaih chu thla thum (3) chin a ni” (YMA General Conference 1982 thurel 12-na).
Thatni lam :
1. SL. NO. 1-NA : MAN
Siamthat rawtna :
Sub No. (c)-a chin hauh loh tur a ni tih hi tih loh theih nise tia thlak nise.
2. SL. NO. 3-NA : INCHEINA
Siamthat rawtna :
Sub. No. (c) belhin, - Inneih nia inchei/thuam nan hian Mizo incheina hman uar hram hram nise tia dah nise.

Training tan dawn

C.YMA ruahmanna Training chu Dt 20.10.2014, Thawhtanni atang hian Kolasib-ah training neih a ni dawn a. He Trainingah hian Zampuimanga Group aiawhin YMA branch hrang hrang atangin mi 13 training-ah an tel ve dawn.

Hetiangin :Cement Mistiri; Bairabi North-1, Bairabi South-1, Pangbalkawn-1, Meidum-2.Mobile Repairing; Bairabi North-2, Bairabi South-1. Electric Wiring; Bairabi ‘N’-1, Meidum-2, Pangbalkawn-1, Bukvannei-1.

Silver Jubilee lawm dawn

Bairabi South Branch MHIP chuan Dt 23rd October 2014, Ningani hian Silver Jubilee (1989-2014) an lawm dawn.Silver Jubilee lawmna programme hi Zampuimanga Hall-ah chawhma dar 11:00 tan tura ruahman a ni a, MHIP Gen. Hqrs. leh Sub-Hqrs. hruaituten an rawn hmanpui dawn nia thu dawn a ni.

PROGRAMME
Chairman : Pi Chawngthuami, President
Tanna hla : 'Aw Nang Kan Lal Kan Pathian'
Hunserh : Pi Lalchhingpuii
Reports : 1) Secretary report
: 2) Finance report
Zaipawl : MHIP Bairabi 'S' Branch
Thusawi : Chief Guest
(Pi Lalthlamuani, President, Gen. Hqrs, MHIP)
Solo : Pu PC Lallianthuama
Thusawi : Pu Lalduhsanga, ADM (J)
Thusawi : President, MHIP Kolasib Sub-Hqrs.
Solo : Nl F.Lalenkawli
Thusawi : Pu J.Lalchhuanawma, VCP Bairabi
Solo : Pu C.Lalrinsanga
Thusawi : Pu F.Lalduhawma, President 'S' Br. YMA
Fiamthu : Pu H.Vanlalnela
Thusawi : Dr. Lalengzauva, Bairabi
Thusawi tawi : A duh apiang tan
Vote of thanks : Chairman

2015 YMA General Conference atan inbuatsaih tan Organising Committee din a ni ta Group YMA Executive member ruat belh

Kum 2015 YMA General Conference Zampuimanga Group YMA in Bairabi-a kan thlen turah inbuatsaihna neih tan a ni ta a, Dt 15.10.2014-a Group YMA Executive Committee meeting Bairabi North Branch YMA Library Building-a neih chuan 2015 YMA General Conference Organising Committee a din ta a, theihtawp chhuaha hmalak tan tum a nih thu dawn a ni.

Group YMA hruaitute chuan 2015 YMA Gen. Conference, Zampuimanga Group-in Bairabi-a a thlen turah hian zo taka thlen an tum thu leh nasa taka inbuatsaih an tum thu an sawi a. Hemi kawnga hmalakna ah hian a bik takin Bairabi khaw mipuiten theihtawpchhuaha Gr. YMA hmalakna tawiawm tur leh tun atanga rilru lo seng lawk turin an ngen a ni.

Group YMA Adviser pahnih te sorkar hna avanga hmun danga sawn an nih avangin hetiangin Adviser pathum ruat belh an ni :
1) Pu Lianzuala, R.O Bairabi Forest Range
2) Pu Lalrinawma Hrahsel, SDO, PWD Bairabi Sub-Division
3) Pu Lalramchhana, R.O Saihapui ‘K’

Tin, Group YMA Executive committee member atan heng mite hi ruat belh an ni : 1) Pu H.Lalhmangaih, Bairabi South
2) Pu C.J Lianchungnunga, Bairabi North
3) Pu Laldinpuia Ralte, Bairabi South
4) Pu J.Laltana, Pangbalkawn

Editorial - 11-10-2014

Kar hmasa lamah Chanchinbu buaipuitute YMA General Conference Ratu lamah kan kal ve avangin YMA THIAN a chhuak thei lova, thupha kan chawi e.
YMA THIAN tih takah tun tum Issue phei chu a YMA lehzual lo thei lova, hmun kan awh zau lutuk ang tih hlauhna avangin chhuah tura kan tih thenkhat kan la chhuah thei lo mah mah! Kan inhrethiam tlang mai aniang chu.
Hei kan chanchinbu phek hi a la chhuak ve hram hram zel a, a chhuak thei lo mai ang tih a hlauhawm ta hle mai! Thenkhatin thahnem an ngaih viau laiin thenkhatin a thahnemngaite rilru ang kan pu phak lo deuh niin a lang, YMA THIAN copy latu zaa 50 velin a man kan pe thin a, a zatve vel hi a man kan dawng lo niin a lang, a pawi hle mai. A man pek lama tlawmngaih chhuah tur leh thahnemngai turin kan inchahin kan  inngen thar leh e.
Tunhma kum 5 kalta leh tun dinhmun han thlir hian Bairabi khua hian a chhe lamah leh a tha lamah nasa takin danglamna kan nei awm e.
Mite sawi kan hriat thin, ruihhlo No. 4 an tih chu tunlai hian a lar hle mai a, thalai tam tak rin loh tak tak, helamah hian kan tlan niin a lang, thil duhawm lo lam a ni. Ruihhlo do kawngah tan kan lakthar a ngai  hle niin a lang.
Thil duhawm lamah chuan, “Bairabi hi ka khua a ni....” tia kan khaw tana thahnemngaihna rilru pu leh hma a sawn theihna tura a taka thawk duh kan chhuak zel niin a lang, a lawmawm hle mai. Nu leh pa chang nilo, Thalai rilru-ah pawh theih ang tawka inpek duhna rilru a piang zel, i intihhmuh zel ang u.
Veng thenkhatten an veng chhung kawng hrang hranga a lo thianghlim theihna tura Tlawmngai Pawl an din te hi a lawmawm hle mai, huaisen takin pawl dinchhan ang ngei hian hma la mawlh rawh se.
A tawp berah chuan, inlungrualna leh tanrualna tak tak kan mamawh. A sawia sawi inlungrualna nilovin, a thawha thawh inlungrualna neih i tum zel ang u.
2015 YMA Gen. Conference kan thlen turin min fan hneh tlang hle nia hriat a ni. He Conference hi Group YMA thlen tur a ni a, a dawngsawngtu tur leh a taka beitu tur chu Bairabi khaw mipui te. Bairabi khua i nih chuan theihtawp i lo chhuah ve tur a ni. Midang tih atana i khek a, midang an mualpho si chuan nangpawh i mualpho ve dawn tho tho.
He khua Bairabi hian hma a sawnna tur chuan midang nilovin nangmah kha..., kan zavaia tangrual tur leh theihtawp chhuah tur kan ni. Hawh u, kan khuain hma a sawnna tur leh a changkan zel theihna tur hian kan theihtawp i chhuah theuh ang u.

CHHIARPUI - NATIONAL POPULATION ENUMERATION BIOMETRIC ENROLLMENT - Martin Zothanfala

Chhiarpui (Census) hi khawvel ram tin ten an neih vek a ni a, He mi behchhan hian ram kalphung leh kal zel dan tur leh budget thlenga duan thin a ni. India ramah chhiarpui Unique Identification (UID) chu kalpui mek a ni a. He thil thar (UID) hi ramdang mi India hausakna rawn chhim ve tuma lo lut ru te dan nan leh khawvel mihring tam tak zingah pawh ‘hei hi chu kan mi leh sa a ni’ tia India sorkarin min thliar hran theihnana tih a ni bawk. Khawvel nun changkang zelah thil awlsamnan khawl hman deuh zel a ni tawh a, thil lei leh hralh chungchangah pawh a pawisa faia leklam kan uar ta lo tulh tulh bawk. Pawisa lachhuak tura Bank-a intlar ngai tawh lovin hmuntinah ATM hun a ni tawh a. Nimahsela, he ATM Card pawh hi tihbo palh theih ala ni cheu a. Nakin lawkah chuan tu’n kan hmakhua kan hrelo, Delhi tlangah pawh kan lo bo palh anih pawhin kan kutze thla leh mit naute thla hmangin awlsam takin kan Account kan hawng zung zung tawh mai dawn a ni. A chhe berah pawh chhungte hriatloh ruang hlawmtu neilo pawh an tlem sawt ngei ang.

Hetih lai mek hian mi thenkhat te chuan Bible bung leh chang thenkhat la chhuakin he Census hi ‘Sakawlh chhinchhiahna’ tia lo la vung tawk an awm a. Tu mumang mang emaw rinchhanin Martarna dar an lo tum ri ang vung vung a, ‘Kross thu chu boral mek te tan chuan atna a ni si’ tih chu a takin an rawn lantir a ni.

Heng mite hian chu hlauhna chu midang zingah chanchintha ang hrimin an vawrh darh a. An zingah hian sorkar hnathawk leh sorkar atanga hamthatna dawng mekte pawh an awm a ni. He thil hi CCS Rule. 9 Clause(i) ah chuan phal loh tawp a ni a, a hremna pawh a na hle. Kan Bible-ah II Thesolonika 2:3 ah chuan, “Tuman engmah in tihder che u suh se, tluksanna chu a lo thlen hmasak zet a, Dan Bawhchhepa, boral fapa chu a lo lan loh chuan, chumi ni chu a thleng dawn si lova” tih a ni a. Tin, chu Danbawhchhepa chuan tihluihna nen mite chu an kut dinglamah leh an chalah te a chhianchhiahna a puttir dawn a ni. Tuna Census neih mekah erawh hi chuan Danbawhchhepa chhinchhiahna ni lovin keimahni mimal tin te kan inchhinchhiahna a ni zawk a, tihluihna a awm lo. Amaherawhchu, hmun a tlem, ram a tlem kan ti mathlawn lovin India khua leh tui nih duh lo te chu Foreigners an ni a, an tan India ramah hmun a awm lova, khua leh tui te chanvo leh hamthatna te an dawng ve thiang hek lovang. Khawchhak lungpui hlau te ang deuh khan Tlang sangah te, Japla ah te an la pem khawm anga, a tawpah kekawr mawng bel nen Malaria hrik nen an lo haw be leh mai lawng maw!!

Mizote hian kan Sakhuana hi kan la run em em a. Lal Isua thu te aia thildang ngai pawimawh ta viau lah kan tam narawh. Engemaw hlekah ar hmu ang maiin kan phawk hra mai thin. Kan Lal Isua chuan hlau turin min zirtir lova, kan Bible chhungah ngei pawh vawi 300 chuang “hlau suh” tih hi a chuang zawk a ni. Johana lehkhathawn 1-na bung 4:18 ah chuan, ‘Hmangaihna ah chuan hlauhna reng a awm lo; hmangaihna famkimin hlauhna a hnawtchhuak zawk thin a ni, hlauhnaah chuan hremna a awm si a, a hlaute chu hmangaihna ah a la famkim lo a ni’ tih a ni a. Keini ringtute phei hi chu hlau tur kan ni lova, Danbawhchhepa lo lan hma hawta hlau tur kan nilo lehzual. Thenawmpa an hla “Martar duh te chuan Isua Baptisma channa Jordan luiah ngei buh rawtsawmna lung awrha zu zuanthlak mai tur” a tih ang deuhin zu ti ta mai se, ran pawh a rang deuh mahna. Mahse, hnehtu hruai hrang lawmtu Lal leh Angel var nen lallukhum mawi nen kawtthler mawi ah chuan min lo hmuak ang maw? Lal Isua hnung kan zuina tur hi Kristian te chuan kan ngaihpawimawh ber tur a ni a, Kaisara chhiarpui neih laia piang a ni kan Lal Isua pawh kha. Tin, kha chhiarpuiah pawh khan a tel ve ngei a ni. Kha chhiarpui avanga a nu Mari pawh raipuar teuha Jerusalem pan a ni a. Chu chhiarpui ngei chu Chhandam kan nih theihnana Zawlneite hrilhlawk Bethlehema a lo pianna atana rahbi pawimawh ber a ni asin! Kaisara thil chu Kaisara hnenah pe ula, Pathian thil chu Pathian hnenah pe rawh u a tih angin  khua leh tui ten mawhphurhna kan hlen hi Pathian duhdan a ni zawk e. Ramdang Burma leh Bangladesh miten he Census-a tel ve loh mawlh hlaua an phet an phet lai hian khua leh tui dik tak zawk te hian kan chanvo chu i hmaih lo ngam ang u.

Tun tum chhiarpuiah hian mit, kutzungtang thla leh thlalak pangngai a ni a, hemi hmang hian ADHARR Card siam a ni dawn a ni. Engmah taksaa dah belh a awm lova, Pathian thil siamsa mihringte thiam taka a duan thla lak mai a ni. Tin, he chhiarpui thlalak hian mi zawng zawng a huap lova, India mi kum 5 (nga) leh a chunglam chin zawngin lak tur a ni. He thlalak chungchangah hian hriattur pawimawh tak chu intihluihna a awm lova, a duhte chauh lak tur a ni. Amaherawhchu, khua leh tui tha chuan chhiarpuiah hian a in chhinchhiah ngei chu a tih makmawh a ni. Chhiarpui milin ruahmanna sawrkarin a siam thin miau avangin. He chhiarpui thlalakah hian i taksa bungah thlalak atang ringawtin engmah a in chhu kai lova, taksa ah number engmah chhinchhiahnan ziah a nilo tih hi hre nawn leh ila a tha awm e.

Khua leh tui ten sawrkar ram relbawlna kawnga kan puih theihnan leh hmasawnna leh venhimna kawnga chak leh zuala kal a nih theihnan India khua leh tuite he chhiarpui thlalak ah hian in enroll theuh turin kan insawm a ni.//

C.YMA president Lalbiakzuala thusawi laktawi

YMA member zingah political party-a inhnamhnawih leh tel an awm a nih pawhin, YMA nihna hre chiang tak tak chuan YMA-ah a keng lut tur a nilo. YMA chu eng political party mah thununtir tur a ni lo. Khawi emaw branch YMA hruaitu thlannaah 'rulling lam an chak,' emaw 'opposition lam an chak' tih tawngkam awm thinte hi a zahthlak hle a ni.
Tun hmaa YMA leh tun hnua YMA chu a kal dan a inang tawh lo hle mai. Tuna kan hmuh leh hriat, min chenchilhtute hi tun hmaa awm ngai lo leh hriat lohte a ni; YMA chuan a thil tum tihlawhtling zel siin, a kal dan a tihdanglam loh thei lo a ni.
YMA kumpuan atana thlan thar 'Ram leh hnam humhalh' chungchang ah, "Nang leh kei hian Mizoram lo chu ram kan nei lo. Chu kan ram neih chhun humhalh leh hmangaih chu kan tih tur a ni dawn lo em ni?".
YMA hmalakna zel turah politics-a ngaihdan leh kohhran thurin inan lohnain hmalakna tur tithuanawp lo se, Kan zavai hian kan ram leh hnam humhalh turin kan tling tawk vek a ni; YMA member tinin mahni theih tawk theuh an tih phawt chuan kan hlawhtling ngei ang.

YMA General Conference 2015 report tlangpui

Kum 2014 YMA General Conference chu Dt 30.9.2014-2-10.2014 chhungin Ratu, Pûma Zai Rûn-ah neih a ni a, report tlangpui hetiang hi a ni.

Conference hmanpuitu Khuallian, Minister Lal Thanzara chuan Sorkar, Kohhran leh YMA-te chu Mizorama pawl hlawm lian pathum an ni tih sawiin, "Lungthu pathum nia an tanho tlat apiangin mipuiin malsawmna an dawng thin" tiin Sorkar, Kohhran leh YMA tanho a tul zia a sawi a. "Ruihhlote hian kan ram hi luhká leh chhuahkáah an hman tlat avangin, khawvel awm chhung chu kan inchiahpiah dawn niin a hriat theih a, chuvangin, tun aia nasa lehzuala damdawi hlauhawm lo chhuak thar zelte hi sorkar, kohhran leh YMA-ten tih tak zeta kan doho zel a tul a ni," a ti bawk.

YMA General Conference-ah hian palai riak lut mi 2,577 an awm a, lehlánga kal mi engemawzat an awm bawk. Central YMA Gen. Secretary, Pu Vanlalruata hnen atangin Annual Report 2013-14 ngaihthlak a ni a, report-a a lan danin YMA Branch 799, Group 46 leh Sub-Hqrs. panga an awm a, YMA member 3,90,937 an awm mek a ni. Finance Report pharhah sum hmuh beisei Rs 85,62,152 ah Rs 85,88,694 hmuh a ni a, hmanral Rs 81,58,746 a ni. C.YMA Treasurer Pu J.Lalsailovan budget a pharh a. Budget ruahmanna Rs 93,18,200 chu pawm a ni.

Rorel inkhawm tan hmain pandal kawtah CEC member R Lalngheta'n YMA Exhibition a hawng a; rolrel inkhawm laiin, community hall-ah rorel palai ni ve lote tan variety programme neih a ni. Rorel palai hi 656 niin nilengin Conference Rorel inkhawm neih a ni a. Agenda-a sorkar khawih pahnih, YMA khawih pali leh kumpuan atana rawtna pahnih - 'Intodelh' tih leh 'Ram leh hnam humhalh' tihte a awm a ni. Sorkar khawih pahnihte chu pawm ve ve a ni a, YMA khawiah chuan pali zinga pathum pawm a ni.

Kum 2015 chhunga YMA kumpuan atan 'Ram leh hnam humhalh' thlan a ni. Hlamzuih chungchang sawiho a ni a, rawtna hrang hrangte sawiho a nih hnuah hlamzuih chin atana pawm lai, thla thum chin tih chu hman zui zel ni se tih a ni a

YMA Conference thurelte :
YMA khawih:
1. YMA dan bu ennawn ni rawh se. 2. Kan hnam incheina thawmhnawte hi tun aia uluk leh fimkhur zawka humhalh ni rawh se.
3. Chhiatrupna laka lo inven dan zirtirna hi thingtlang lamah neih a nih ve theihna atan CYMA-in hma la rawh se.

Sorkar khawih:
1. Mizoramah paper mills siam a nih theihna atan sorkarah ngenna siam ni se.
2. Drug licence sorkarin a pek dawnin, licence diltu awmna branch lehkha tel ngeia pek a nih theihna atan hma lak ni rawh se.
Kumpuan bawhzui tha thlan chhuahte puan an niin lawmman sem a ni a; lawmman dawngtute chu :
BRANCH YMA Kumpuan bawhzui thate :
Pakhatna - Electric Veng Branch YMA, Aizawl
Pahnihna - Saitual Venglai Branch YMA
Pathumna - Tuikual North Branch YMA, Aizawl
GROUP YMA Kumpuan bawhzui thate :
Pakhatna - Saitual Group YMA
Pahnihna - Khawzawl Group YMA
Pathumna - Tuiphal Group YMA
YMA chanchinbu tha lawmman hlan a ni a, chanchinbu tha ber atan Vaivakawn branch YMA chanchinbu 'Vaivakawn Weekly News' thlan a ni.
Kum 2015-a YMA General Conference chu Zampuimanga Group YMA-in Bairabi-ah kan thleng dawn a ni.