BAIRABI SOUTH THLANMUAL IN SAK THAT A NI DAWN

BAIRABI SOUTH THLANMUAL IN SAK A NI DAWN TA

Bairabi South-in Thlanmual In an neih mek chu a that tawhloh avangin Br. YMA leh Village council-in a thar sak a nih theihna turin sorkar-a an dil chu pawm a nih ta a, vawiin Ni 13.8.2019, Thawhlehni khan a hmunah ruahmanna siam fel a ni.

Thlanmual In thar hi ruahman dan chuan a len zawng 20x18 ft tura ruahman a ni a. Vawiina DRDA lam aiawh Pu Johny-a J.E Thlanmual In sakna hmunhmate en fel tura lo kal chuan a hmunhmain a zawh tawk angin 18x12ft a sak turin ruahmanna min siamsak a, thlanmual in hlui chu lo thiat tur leh thiah zawh hnua a thar sak hna tan nghal tur a nih thu sawiin min tin san leh ta a ni.

Thlanmual in hi RCC tur niin a chungah Rangva chih tur a ni a, khawchhiat changa ruahsur hnuaia in vui thinte a awm loh nan he Thlanmual in hi invui nana hman theih tur leh store room leh thlan lai tute hahchawlh thinna tur atana ruahman a ni.

Kan mamawhnate hria a sorkar-in hma min laksak hi a lawmawm tak meuh meuh a ni.

RUIHHLO CHUNGCHANGA HMALAK DAN TUR SAWIHO

Bairabi : Ni 13.8.2019, Thawhlehni

Vawiin Ni 13.8.2019, Ningani Dar 4:00pm khan Bairabi South VC Hall-ah Branch YMA Kumpuan ruahmanna angin Village Council, VDP leh YMA ten Ruihhlo hluar lutuk tih ziaawm dan tur ngaihtuahin sawihona khun khan tak neih a ni.

Vawiin meeting-ah hian member 30 vel kalkhawmin Meeting hi Village Council President Pu R.Lalrinawma'n a kaihruai a, Pu B.Lalnunkima Br. YMA President hnen atangin ruihhlo chungchang leh kan khawtlang dinhmun sawihawnna ngaihthlak a ni a. Pu C.Lalchhuankima, Br. YMA Vice President leh Kumpuan Chairman ni bawkin YMA in hma a lo lak tawh dan te report a pe a. Pu F.Lalduhawma, VDP President-in VDP kalphung te leh activities an neih dan tur te sawiin YMA lam nena inhne renga kal an tum thu te a sawi.

Meeting-a kal member hrang hrang ten ruihhlo chungchanga hma lak dan tur leh ngaihdan te sawiho a ni a. Tihtakzeta ruihho do a tul thu te, pawl pakhat chauh hmalaknaa beih chi a nih loh thu te, khawtlang tanrualna a pawimawh thu te sawi a ni.

Bairabi khua, a bik takin Bairabi South area-a ruihhlo chungchanga hmalak dan tur.......

Sawihona neih zawhah Kumpuan Committee-in chawhlui an buatsaih chu tlai taka kilho a ni.

PHE PIPELINE THAR TUR RUAHMANNA ENHO

BAIRABI : 12.08.2019, THAWHTANNI

Vawiin August Ni 12, Thawhtanni hian Bairabi South huamchhunga PHE Tui Pipe Line hlui tawh lutuk thlak tura VC ten ruahmanna an lo siam tawh chu PHE Dept. aiawha Survey tura rawn kal JE. Pu Rintluanga hovin Village Council te nen a hmunah enin pipeline kalna tur ruahman a ni.

Tui Pipe line hi kawngsir lehlam lehlamah Public line leh Connection line kal hrang tura ruahman a ni a, hetiang ang type hi Mizoramah a vawikhatna tur anih thu Dept. lam hotute atangin thu dawn a ni.

Bairabi PHE Pipeline hi kum 1980-85 chho bawr vela siam tawh a ni a. Pipeline hi a tira ruahman dan ang leh an pipe hman len zawng atanga teh chuan tun anga mihring tam tak chawm thei tura ruahman a nih loh hmel a. A chhan chu pipeline te hi lian tak ni lovin thingtlang chawm theihna tura awm leka te (small size) a nih thu hriat a ni. Tin, pipeline hi a tuiek nasat tawh avangin hmun tam takah a put (leak) nia hriat a ni a, hei hian mipuiin tui an dawn theih tur ang pawh an dawn theih loh phah na chhan nia rin a ni.

Bairabi khua hian tlangkar luite tui lak tur kan nei hi kan vannei hle a. Luipui atanga pump chhoh ngai lova tui lakna hnar tha tak kan nei hian Deparment lam atang pawha senso hautak tur hi a veng hle awm e. Chutihrualin, Bairabi khua; a bik takin Chhimveng lam area ah tui lamah harsatna kan tawk nasa hle a, mipui lam harsatna hriaa khawtlang hruaituten theihtawp an chhuah leh hmalakna thar hmuh tur awm ta hi thil lawmawm tak a ni.

PHE Pipe line thlak a nih theihna tur atana chak taka Bairabi khawtlang, a bik takin Bairabi South tana hma laksak tu Chief Minister zahawm tak Pu Zoramthanga leh bialtu minister Pu K.Lalrinliana te, PHE E.

E Pu Lallianmawia te chungah Bairabi South Village Council te chuan lawmthu an sawi tak meuh a ni.

LEIMIN DAWLNA SIAM DAN TUR RUAHMAN

BAIRABI : NI 10.8.2019

Vawiin Ni 10.8.2019 hian Bairabi South Tlawngkam leimin danna siam tur chungchangah Kolasib DC ruahmanna angin Pu K.Samuela, Field Worker leh Pu Nauraj, JE Soil Department te nen a hmunah enin ruahmanna siam a ni. Leimin dalna tur hi *Gabianic Structure* chhawrduh thum vel siam tura ruahmanna siam a ni a, a hmuna rawn entu Engineer te hian Detail Estimate siamin Ni 14.8.2019, Nilaini hmain DC hnenah report & estimate hi an thehlut dawn a ni.

CHHIAT TAWK

*CHHIATTAWH/ZUALKO*

Pu C.Laldawla, Kum-83
C.Lalchhuankima, Branch YMA Vice President Pa chu tukin Ni 10.8.2019, Inrinni Chawhma dar 10:20 khan a chenna in Ramthar Veng Bairabi South-ah stroke vangin a boral.

Zaninah lumen a ni ang a, naktuk Ni 11.8.2019, Pathianni chhun dar 12 ah vui a ni ang.

Pu Dawla hi hun engemawchen atang khan Thisen sang vangin Aizawl lamah te entirin enkawl a ni a. That lam a pan chho deuh nia hriat chang te a awm a, amaherawhchu kum upa lam lo ni tawh nen a natna chuan zual lam a pan zel a, a tu leh fa, chhungkhat laina ten hmangaih tak leh theihtawp chhuaha an enkawl laiin tukin zing dar 10:20 khan min kalsan ta.

A kalsan tak a chhung leh khat, a tu leh fate Pathianin awmpui zel rawh se.

KUANG ZAWNNA THAR KAN NEI TA

KUANG ZÂWNNA/NAWRNA THAR

Branch Comt thurel anga kan hruaituten hun engemawchen atanga an order *Kuang zâwnna* chu siam peih a ni ta e. Motor kawng chinah chuan Thela ke hmang hian a nawr theih anga, tlangram chinah chuan a zawna zawn theih a ni bawk dawn a ni.

RAM THAR VENGAH LEIMIN VANGIN HARSATNA A THLENG

Nizan Ni 3.8.2019 dar 10:30 vel khan ruahsur nasa tak avangin Bairabi tlawngkam lei a min leh a, chenna in pakhat min chhiatpuiin chhungkaw chenna in pahnih bungrua inthiar chhuah a ni a, chhungkaw dang 5 vel hlauhthawnawmah an awm mek.



Leiminin a tihchhiat in neitu hi Pi Lalneihkimi W/o Lalnunfima (L) a ni a. Pi Zaithanpuii D/o Pu Darlawma (L) (Thangpuii in luahtu) te leh Pu Ramfangzauva S/o Pu Lalnuntluanga (MHIP In luah mek tu) te pawh an in luah lai hi tla mai thei dinhmuna a din avangin bungrua thiar chhuah a ni.


Leimin chungchang leh in thiah chungchanga hmalak dan tur relin Tukin dar 7:30 khan Bairabi South VC te leh Br YMA te, khawtlang hruaitute meeting neih a ni a.

DC office lam hriattir an nih angin tukin zing Ni 4.8.2019, Pathianni zing dar 8:30 khan  Office lam atangin SDC Pu Timothea leh DM&R lam atangin Pu Fela ten a hmunah rawn enin sorkar atanga tanpuina awm thei ang ang te hmuh a nih theihnan hmalak tum a ni a, leimin avanga harsatna thleng thei dang te pawh a tul anga bawhzui an tum thu dawn a ni.

Leiminin a hnawl In chima bungraw chuh theih ang ang lakkhawm hna leh Pi Zaithanpuii te in thiah hna hi Branch YMA ten Pathianni hian thawh nghal a ni.

Bairabi Jt. YMA in ruahmanna a siam angin Ni 5.8.2019 khan Leimin avanga in chim leh maithei dinhmuna ding MHIP Hall thiah hnatlang neih a ni a. Pi Zaithanpuii te chenna tur in pawh sak sak nghal tura ruahmanna siam a nih laiin a sakna tur hmun chungchangah harsatna a awm avangin in sak hna hi chu thulh lailawk a ni.

Leimin avanga harsatna tawk te tanpuina kawnga YMA in hma a lakna kawng hrang hrangah Village Council ten chak tak an tih tur an tih zung zung avang tein hna a awlsam phah hle, Jt YMA, Bairabi North Br. te leh NGO dang dang ten min tawiawmna te, tanpuina petu leh tha thawhtu khaetlang mipui te chungah lawmthu kan sawi tak meuh meuh a ni.

ILP CHUNGCHANGAH MEETING NEIH A NI

Ni 12.7.2019, DC Conference Hall

Assam & Mizoram border issue chungchang.

DC hnen atangin Kolasib District chhunga ram buai chungchang harsatna thlen lo tur leh boruak muanawm a awm theihna turin sawrkar hmalakna thlawp turin meeting-a kal NGO leh VC aiawh te a ngen a.

Police Dept lam atangin Lailapur buaina chungchanga sorkar hmalakna Sipai dah a nih thu report a ni a. Sorkarin buaina hmun effective area-a a ngheta sipai dah a nih dawn leh dawn loh a chiang lo.

NGO leh VC aiawh ten mipui leh NGO, Zirlai pawl ten anmahni bila hmalak ngai lovin sorkar-in chak taka hma a lak an duh thu te, sorkar hmalakna kal mek eng chin nge tih zawhna pek a ni a. DC in thuneitu sang zawka thlen a tum thu a sawi a.

Ei leh bara kan intodelh hrih loh avanga sorkar hmalakna nghak lova mimal leh pawl anga hmalakin buaina min thlen thin dan hre renga boruak muanawm siam hram hram turin kalkhawm te min ngen.

HMEICHHE NAUPANG KAWNGBO A CHHUNGTE HNENAH YMA IN HIM TAKIN AN HLAN

HMEICHHE NAUPANG KAWNGBO A CHHUNGTE HNENAH YMA IN HIM TAKIN AN HLAN



Ni 5.6.2019 zan dar 11:30 velin Bijita, Manipuri hmeichhe naupang kum 16 mi vel hi Bairabi khuaah a rawn thleng a.

A sawi dan chuan a nu nu, a pi a rawn zawng a ni. Naupang te an nih laiin a nu leh a pa hi an inthen a, a nu kiangah  khawsain kum 8-9 vel a nihin a nu hian Dimapur-ah mi bulah a dah niin a sawi. Dimapura a awmna hi nuam a tih loh avangin a awmna te hriat lohvin a tlan chhuak a, Garo mi a hmuh chu zuiin a mi zui Garo mi te in Guwahati ah hian nikum 2018 July thla atang khan a khawsa niin a sawi. Hun engemawchen Garo mite bul Guwahati-a awm hnu hian an khua Boirobil-a kal a duh thu leh a pi zawn chhuah a duh thu a sawi a, a awmna te phalna lain Ni 4.6.2019 zan dar 11:30 khan Train-in Silchar a rawn pan a, Ni 5.6.2019 chawhma dar 10:30 velin Silchar rawn thlengin Boirobil-a kal a duh thu a sawi leh amah hian a kal tumna tak Boirobil hi khawia awm nge a hriatchian loh avangin Bairabi Mizoram hi a rawn thleng ta a ni.

A rawn thlen hian mi tlawmngai thenkhat ten a hmunhma sawi hi en turin an hruaikual a, zan thil a nih avangin engmah hriatchhuah theih a ni lova, chinchang hre tur bera ngaih Pi Malsawmi Ramhlun Veng Bairabi South, kum engemawzat Manipur State-a lo khawsa tawh hnenah riahtir a ni a. Pi Malsawmi hian YMA hruaitute hriattirin a chungchang thuah hian Bairabi South Branch YMA, MHIP hruaitute leh Bairabi South VC te chuan theihtawp chhuahin hma an la a. A tir takah chuan fimkhur thuhlaah a chungchangah hian Bairabi-a SIB te leh Police lam te pawh information pein an ni nen hian a dinhmun zirchian a ni a. Ni 9.6.2019 Sunday khan mi hlauhawm a nih loh zia leh a kalna tur ber pawh hre lo, kawng bo, harsatna nasa tak a lo tawh thin avanga mahni ngaihtuahna pawh hmang hleithei lo nia ngaihna chu nemngheh a ni a.

Ni 9.6.2019, Sunday hian he hmeichhe naupang hmun sawi leh khaw hming sawi te theihtawp chhuahin Police Department te nen biak pawh tum a ni a, Internet lam nen tangkawpin Manipur leh Assam District hrang hrang te biak kual a ni a, hmasawnna tam tak hmuh theih a ni lem lo. Hemi ni Sunday vek hian Branch YMA President Manipuri thian, Katlicherra lama awm te hrilhhriat an ni a, anni hi Association mumal tak indinin MRJAMS RESCUER GROUP inti an ni a, tlaiah Bairabi ah rawn chhovin Branch YMA hruaitute nen ruahmanna siamin Branch YMA Secretary chhungte hnen atangin hmeichhe naupang khaw hming sawi zinga pakhat Boirobil, Cachar District chu kan hmun hma duh a nih theihna rinna lian tak neih a ni a, Manipur unaute hi lo zuk fang tur leh hmeichhe naupang chhungte lo zuk zawng chhuak tura an tlawmngaihna ngen a ni.

MRJAMS RESCUER GROUP, Manipur unau Katlicherra a mi te hian Ni 11.6.2019, Thawhlehni khan Boirobil, Cachar Dist. Assam chu lo zuk tlawh chhuakin vanneih thlak takin hmeichhe naupang chhungte ni awm tak hi zuk zawnchhuah a ni a. Bairabi South Branch YMA hruaitute hnenah chanchin rawn hriattir a nih hnuah Ni 12.6.2019, Nilai zan khan Bairabi South Branch YMA leh MRJAMS RESCUER GROUP te hian ruahmanna an siam a. Ruahmanna siam a nih angin Ni 14.6.2019, Zirtawpni khan he hmeichhe naupang khawngaihthlak tak hi a chhungte hnenah Bairabi South Branch YMA leh Bairabi Police te chuan an hlan leh ta a ni.

He hmeichhe naupang zawnchhuah kawnga tlawmngai taka YMA thawhpuitu; MRJAMS RESCUER GROUP te, Police Department te, NGO dang leh VC te leh he hmeichhe naupang hmangaih taka lo enkawltu Pi Malsawmi te chhungkua Ramhlun Veng, Bairabi South te chungah Bairabi South Branch YMA chuan lawmthu a sawi tak meuh meuh a ni.

C LALFAKZUALA (MAFAKA) GOVT COMPLEX AIZAWL RUANG ZAWN KHARNA

C LALFAKZUALA (MAFAKA) GOVT COMPLEX AIZAWL RUANG ZAWN KHARNA

A HMUN : BAIRABI TLAWNG LEI

A HUN : Ni 17.7.2019, Nilaini tlai dar 3:00

BAIRABI JOINT YMA kaihhruainaa Pu C Lalfakzuala tui tla ruang zawn hna chu vawiin Ni 17.7.2019, Nilaini tlai dar 3 khan a kharna hun Bairabi Jt. YMA duty post, Bairabi Tlawng lei ah neih a ni.

A kharna hun kaihruaitu Pu F.Lalduhawma Jt YMA President chuan tlawng luia tui tla an awmin Bairabi khua ten theihtawpa ruang zawn hna an thawh thin thu a sawi a. Tin Bairabi khaw thenawm khuate; Pangbalkawn, Meidum, Suarhliap, Saikhawthlir leh Chuhvel ten an theihtawpa an tawiawm thin thu a sawi a.  Pu C Lalmakthanga JYMA president Bairabi chuan Lawmthu sawina hun hmangin. Tunah ruang hi hmuhrih lo mah ila luidung kalvel leh veivak ten ngaihven vek turin a ngen a. Tlawmngaihna chhawm nung zel turin kal khawm te a chah a. Tawngtaina hun a hmanga ruang zawn hna kalpui chu khar a ni ta a ni. He hunah hian Pu C.Liankunga, S.YMA President Kolasib pawhin thusawina hun a hmang bawk a ni.
‌Jt YMA Secretary Pu HD Lalhlimawma'n tun tuma Pu Mafaka ruang zawn hna an thawh dan tlangpui report pein;  Bairabi Jt YMA kaihhruainaa Ni 13.7.2019 atanga ruang zawn hna an thawh
‌
‌Bairabi YMA hruaitute chuan Pu Mafaka ruang zawn hna an thawh danah leh hun danga ruang zawn hna an thawhnaah Bairabi khaw chhung mai bakah Zampuimanga Group leh Taitesena Group huamchhunga Branch hrang hrang YMA member te leh khawtlang mipui inpekna, an tlawmngaihnaah lawmthu an sawi a. Ruang zawn hna thawktu, duty te tana sum leh pai mai bakah an mamawh hrang hrang petu mimal leh pawl hrang hrang te chungah lawmthu an sawi tak meuh meuh a ni.
‌
‌Hun lokal leh zel turah YMA an nihna anga a tul apianga hma lak zel an tum thu leh member te pawh tlawmngaih chhuah zel turin an ngen a ni. Mizo hnam rohlu tlawmngaihna tilang tu YMA member zawngzawng chungah lawmthu kan sawi a ni.
thu len Ni 16.7.2019, Thawhlehni a Lala, Matijuri, Hailakandi, Tuiruang chhuah thlenga tui tla ruang zawnga motor 4 lai hmanga an zuk kal thu te, lui dung lam pawh engine boat hmanga dap hna an thawh dan leh Hortoki kai thlenga ruang zawn hna an thawh dante, Bairabi ah Ni 5 leh zan thum tlaivar a zawn a nih thu report a pe bawk.

SDO (S) HOVIN ILP CHUNGCHANGAH MEETING NEIH A NI

BAIRABI : NI 8.8.2019, NINGANI : ILP CHUNGCHANG MEETING

Vawiin Ni 8.8.2019, Ningani chawhnu dar 1:30 khan Bairabi SDC Office-ah Pu V.Laldinsanga, SDO (S) kaihhruaiin Bairabi North & South VC, NGO aiawh, Teak lama sumdawng leh Labour Association ten ILP chungchangah meeting neih a ni.

Kan hriat angin tun hnaia C.YMA ruahmanna bawhzuia YMA in ILP an check chungchangah vaihoin hriatthiam loh an neih avangin Gharmurra-a bazar kal te motor an lo hreng a, hemi thu kal zelah hian Vai ho, a bik takin Bairabi-a hnathawk ho ten Mizoram sorkar-ah Bairabi chu Free Zone-a dah an ngiat a. Heng buaina neuh neuh avang hian SDC Bairabi ruahmanna angin vawiin khan hemi chungchangah hian sawihona neih a ni.

Vawiin meeting-ah hian hnam dang ILP check chungchanga hmalakna hrang hrang te, Labour Association-in an member te damloh leh tanpuina an ngaih changa tanpuina tur atana contribution mi pakhatah Rs 30/- an khawn thin chungchang te report ngaihthlak a ni a. Tun thila buaina lo irh chhuahna chhan ber nia lang chu Teak leh thil danga sumdawng vai thenkhat; Bairabi-a in luaha awm te leh hnathawktute Temporary Permit chauh ni lova Permanent Permit nei tura ngiatna avang nih rin a ni.

SDO(S) leh SDC Pu Timothe-a te hnen atangin Temporary Permit hi hnathawh phalna permit a nih loh thu leh Permit pangngai an buaipuina atana pek an nih thu te ngaihthlak a ni a. Hnamdang (Vai) kan tih zawng zawng ten Bairabi leh Mizoram chhung an lo luh dawn leh hna an thawh dawn chuan Permit dik tak an neih vek theihna tura hmalak a tul thu leh chutiang a nih theihna tura hmalak a nih tur thu te ngaihthlak a ni. Tin, hnam dang sponsor chungchangah Mizote kan fimkhur a tul zia thu te ngaihthlak a ni a. DC Office lam atangin mipuiah inhrilhhriatna leh inzirtirna a rang lama neih a tul thu ngaihthlak a ni bawk.

Vawiin Meeting hian Zophaia Mosolman biak in (Mosjid) sak that hna kal mek te, a bula in te sak leh dawr siam thar awm chungchang te sawiho a ni bawk a. Assam leh Mizoram sorkar hian 'reserve area-a' khairual taka kut thlak lo ve ve tura thu dah awm mek karah hmalakna thar Assam lamin an nei thin nia lang chu a that loh thu te sawi a ni a. Chutihrualin, Mosolman biak in bik chu tun hnai buaina awm hma thil, kum 1983-85 bawr vela Pu Thangkhuma'n hmun hma a lo pek tawh, buai hmaa biak in ding, tun hnaia bomb chhiat a nih vanga thawm that hna thawh a nih dan te inhrilhhriat a ni a. Meeting-a kal te hian sakhaw zalenna ram kan nih anga biak in thawm that hna kalpui chu hriatthiam theih a nih rualin ralmuang taka biak in thawm that hna an thawk zui zel duh a nih chuan Zophai leh a chhehvela huan lo ram, leilet neitu zawng zawng ten ralmuang taka an huan lo ram an enkawl ve theihna tura biak in an sak kal lai mek chu a

kar nana hman a remchan thu te sawi a ni.

Meeting zawh hian SDO(S), SDC leh khawtlang hruaituten mosolman biak in sak leh thil dang te enin Zophai hi a hmunah an tlawh a ni.

Thubelh :
1. ILP check leh thil dang emaw avanga vaihoin Gharmura vela motor an lo dang ve ziah hi Gharmura dawr miah lova awm theih a va chakawm ve.
2. Free zone te an han phut a, a sawia sawilan chi pawh niin a lang lo.
3. Ramri chungchang leh hnam issue-a DC level anga hotu lamin an ngaihven leh rilru an pek ang hian sorkar apiang hian ramri buaina hi chinfel tumna tak tak nei thei zel se. Tin, harsatna nei kut hnathawktute hmakhua hi rawn ngai pawimawh hmasa zel se.
4. Tu emaw tawngkam takin 'ILP hi a hman nazawngin lo check chi a ni lo'. Permit neilo pawisa chawi tir te phei chu kan tih ngai hauh lo tur thil a ni tih kan hriat nawn fo a pawimawh ang.